شہزاد ملک
بی بی سی اردو ڈاٹ کام، اسلام آباد |  |
| | | سات برس میں پہلی بار ایوان صدر کی تقریب منسوخ کرنے کا اعلان ہوا ہے |
ایوان صدر میں پاکستان کے یومِ آزادی کی مجوزہ تقریبات کے انعقاد کے سلسلے میں ایک نیا تنازعہ پیدا ہوگیا ہے اور حکومت کا کہنا ہے کہ ایوانِ صدر میں ہونے والی تقریبات منسوخ کردی گئی ہیں جبکہ صدارتی ترجمان کا کہنا ہے کہ یہ تقریبات شیڈول کے مطابق ہوں گی۔ پاکستانی وزیر اطلاعات شیری رحمان نے منگل کو میڈیا کے نمائندوں سےگفتگو کرتے ہوئے کہا ہے کہ بدھ کی شب ایوان صدر میں یوم آزادی کے سلسلے میں ہونے والی تقریب منسوخ کر دی گئی ہے اور یہ تقریب جمعرات کو شاہراہ دستور پر ہوگی۔ انہوں نے کہا کہ تیرہ اگست کی شب جو میوزیکل شو ایوان صدر میں ہوتا تھا اس کا اہتمام وزارت اطلاعات اور پاکستان ٹیلی وژن کی انتظامیہ کرتی تھی اور اب یہ فیصلہ کیا گیا ہے کہ چودہ اگست کو یوم آزادی کی تقریبات اسلام آباد میں کنونشن سینٹر اور شاہراہ دستور پر ہوں گی اور ان دونوں میں وزیر اعظم سید یوسف رضا گیلانی مہمان خصوصی ہوں گے۔ اس کے علاوہ پارلیمنٹ ہاؤس کے احاطے میں بھی سٹیج بنائے گئے ہیں جہاں پر تقریبات کا انعقاد ہوگا۔ اُدھر صدر جنرل ریٹائرڈ پرویزمشرف کے ترجمان میجر جنرل ریٹائرڈ راشد قریشی نے تیرہ اگست کی شب ایوان صدر میں ہونے والی تقریبات شیڈول کے مطابق ہوں گی۔ | | | ان تقریبات میں پاکستان بھر سے فنکار حصہ لیتے ہیں |
بی بی سی سے گفتگو کرتے ہوئے انہوں نے کہا کہ ایوان صدر میں ہونے والی اس تقریب کے دعوت نامے بھی تقسیم کیے جا چکے ہیں اس لیے یہ تقریب کسی طور پر بھی منسوخ نہیں کی جائے گی۔ صدر جنرل ریٹائرڈ پرویز مشرف کے خلاف موجودہ حکمراں اتحاد کی طرف سے مواخذے کی تحریک پیش کرنے کے بعد ایوان صدر اور حکومت کے درمیان ایک تناؤ کی سی کیفیت پیدا ہوگئی ہے اور دونوں طرف سے ایک دوسرے کے خلاف الزام ترشیاں کی جا رہی ہیں۔ واضح رہے کہ گذشتہ سات سال کے دوران یہ پہلا موقع ہے کہ حکومت نے ایوان صدر میں یوم آزادی کی تقریبات منسوخ کی ہیں۔ اس سے پہلے ایوان صدر میں تیرہ اگست کی شب کو جو تقریبات ہوتی تھیں اُس میں وزیراعظم اور کابینہ کے ارکان کے علاوہ فوجی اور سویلین افسران بھی شرکت کرتے تھے۔ | 
صدر مشرف کے مواخذے کا اعلان
