شہزاد ملک
بی بی سی اردو ڈاٹ کام، اسلام آباد |  |
| | | چند روز پہلے ہی اسلام آباد میں واقع ڈنمارک کے سفارتخانے کے باہر کار بم دھماکہ ہوا تھا |
پاکستانی حکومت کا کہنا ہے کہ قانون نافذ کرنے والے اداروں نے راولپنڈی کے علاقوں میں سرچ آپریشن کے دوران چھ دہشت گرفتار کر لیے ہیں جن میں تین خودکُش حملہ آور بھی شامل ہیں۔ داخلہ امور کے بارے میں وزیر اعظم کے مشیر رحمان ملک نے سینیٹ کے باہر میڈیا کے نمائندوں سے بات کرتے ہوئے کہا کہ ان مشتبہ افراد کی گرفتاری راولپنڈی اور اسلام آباد میں قانون نافذ کرنے والے اداروں کو ریڈ الرٹ کرنے کے بعد عمل میں آئی۔ راولپنڈی پولیس کا کہنا ہے کہ انہوں نے جمعرات اور جمعہ کی درمیانی شب ڈھوک کالا خان کے قریب بارود سے بھری ہوئی تین گاڑیاں برآمد کر کے اس میں ملوث چار مشتبہ افراد کو گرفتار کر لیا۔ خبر رساں ادارے اے پی کے مطابق گاڑیوں میں ایک ہزار کلو گرام کے قریب دھماکہ خیز مواد بھرا ہوا تھا۔ سٹی پولیس افسر راولپنڈی راؤ اقبال کا کہنا ہے کہ پولیس کو ذرائع سے اطلاع ملی تھی کہ شدت پسندوں نے راولپنڈی اسلام آباد میں خود کش حملوں اور دہشت گردی کی وارداتوں کی منصوبہ بندی کی ہے جس کے بعد جڑواں شہروں کی پولیس اور دوسرے اداروں نے سرچ آپریشن شروع کیا اور اس دوران پولیس نے بارود سے بھری ہوئی تین گاڑیاں قبضے میں لینے کے بعد چار مشتبہ افراد کو حراست میں لے لیا۔ تاہم انہوں نے اس بارے میں مزید تفصیلات نہیں بتائیں۔ پولیس نے دعوی کیا ہے کہ گرفتار ہونے والے افراد جڑواں شہروں میں واقع حساس مقامات اور اہم شخصیات کو نشانہ بنانا چاہتے تھے۔ مقامی پولیس کا کہنا ہے کہ مشتبہ افراد اور بارود سے بھرے ہوئے پکڑے جانے والے والے مبینہ ٹرک پاکستانی فوج کی انٹیلیجنس ایجنسیوں کی تحویل میں ہیں اور پولیس کا کوئی بھی افسر اس تفتیش میں شامل نہیں ہے۔ راولپنڈی کے تھانےصادق آباد پولیس نے ابھی تک اس واقعہ کی رپورٹ درج نہیں کی اوراس تھانے کی پولیس کا کہنا ہے کہ انہیں اس حوالے سے متعلقہ حکام سے کوئی تحریر موصول نہیں ہوئی۔ انٹیلیجنس ایجنسیوں کے ذرائع نے اس سے لاعلمی کا اظہار کیا ہے کہ مذکورہ مشتبہ افراد ان اداروں کی تحویل میں ہیں۔ واضح رہے کہ اسلام آباد میں ڈنمارک سفارتخانے کے باہر ہونے والے خودکُش حملے کے بعداسلام آباد اور راولپنڈی میں حفاظتی اقدامات سخت کر دئیے گئے تھے۔ | 
ڈنمارک ایمبیسی کے قریب دھماکہ، چھ ہلاک
