شہزاد ملک بی بی سی اردو ڈاٹ کام، اسلام آباد

	ڈاکٹر عبدالقدیر خان کو پاکستان کے ایٹمی پروگرام کا خالق کہا جاتا ہے

طلباء نے ڈاکٹر قدیر سے مملنے سے روکے جانے کے فیصلے پر تنقید کرتے ہوئے کہا کہ وہ اس اقدام کے خلاف تحریک چلائیں گے جو ڈاکٹر عبدالقدیر کی رہائی اور صدر جنرل ریٹائرڈ پرویز مشرف کے مستعفی ہونے تک جاری رہے گی۔

ڈاکٹر عبدالقدیر خان کو پاکستان کے ایٹمی پروگرام کا خالق کہا جاتا ہے اور پاکستان نے دس سال پہلے اٹھائیس مئی کو ایٹمی دھماکے کیے تھے ججن کے نتیجے میں پاکستان دنیا میں ایٹمی طاقت رکھنے والا پہلا اسلامی ملک بن گیا تھا۔

طلباء اور سول سوسائیٹی کے ارکان ان دھماکوں کی دسویں سالگرہ کے حوالے سے ڈاکٹر قدیر سے ملنا اور انہیں تحائف پیش کرنا چاہتے تھے تاہم وہاں تعینات پولیس اور سکیورٹی کے اہلکاروں کی بھاری نفری نے انہیں اس کی اجازت نہیں دی۔

پاکستان میں ڈاکٹر عبدالقدیر خان کو ایک قومی ہیرو کا درجہ حاصل ہے تاہم انہیں سنہ دو ہزار چار میں اُس وقت اُن کے گھر میں ہی نظر بند کردیا گیا جب انہوں نے سرکاری ٹی وی پر اس بات کا اعتراف کیا کہ انہوں نے ایران، لیبیا اور شمالی کوریا کو ایٹمی ٹیکنالوجی فراہم کی ہے۔

	ڈاکٹر عبدالقدیر خان نے سرکاری ٹی وی پر اس بات کا اعتراف کیا کہ انہوں نے ایران، لیبیا اور شمالی کوریا کو ایٹمی ٹیکنالوجی فراہم کی

تین سال سے زائد کی نظر بندی کے بعد ڈاکٹر عبدالقدیر پر عائد پابندیاں نرم کی گئی ہیں اور انہیں اپنے رشتہ داوں سے ملنے کی اجازت دی گئی ہے۔ چند روز قبل انہوں نے اکیڈمی آف سائنسز کا بھی دورہ کیا تھا جہاں پر انہوں نے اپنے قریبی دوستوں سے ملاقات کے علاوہ ڈاکٹر افتخار ملک کی وفات پر تعزیت بھی کی تھی۔ ڈاکٹر عبدالقدیر کا آئندہ ہفتے کراچی جانے کا بھی امکان ہے۔

جماعت اسلامی اور پاکستان مسلم لیگ نون کے کارکن راولپنڈی اور اسلام آباد کے سنگم پر واقع فیض آباد کے قریب چاغی پہاڑ کے ماڈل کے سامنے جمع ہوئے اور ڈاکٹر عبدالقدیر کے حق میں نعرے بازی کی۔

ادھر اسلام آباد ہائی کورٹ کے چیف جسٹس، جسٹس سردار محمد اسلم نے ڈاکٹر عبدالقدیر کی نظر بندی کے خلاف درخواست کی سماعت اُن کی علالت کی وجہ سے متلوی کر دی ہے۔ ڈاکٹر عبدالقدیر کی نظر بندی ختم کرنے کی درخواست بیرسٹر اقبال جعفری کی طرف سے دائر کی گئی ہے۔