ذوالفقار علی بی بی سی اردو ڈاٹ کام، مظفرآباد

	’کشمیری عسکریت پسندوں کوبھی بات چیت کےعمل میں شریک کیا جائے‘

پاکستان کے زیر انتظام کشمیر کی حکمران جماعت مسلم کانفرنس کے سرپرست اور سابق وزیر اعظم سردار عبدالقیوم خان نے دونوں ملکوں کے وزرائے خارجہ کے درمیان ملاقات کو خوش آئند قرار دیتے ہوئے کہا کہ یہ دونوں ملکوں کی حکومتوں کی نیک نیتی کا اظہار ہے۔

اس موقع پر انہوں نے دونوں ملکوں کو یہ تجویز دی کہ کشمیری عسکریت پسندوں کو بھی بات چیت کے عمل میں شریک کیا جائے۔

انہوں نے کہا کہ ہندوستان اور پاکستان کشمیر میں فوج کی تعداد کم کریں، کشمیر کے دونوں حصوں کے درمیان تجارت کا آغاز کیا جائے، بھارت کے زیر انتظام کشمیر ظلم و زیادتیاں بند کی جائیں اور بھارتی جیلوں میں قید کشمیریوں کو رہا کیا جائے۔

انہوں نے کہا کہ ہندوستان اور پاکستان کے وزرائے خارجہ ان اقدامات پر عمل در آمد کے لیے مختصر مدت کا تعین کریں اور یہ کہ ان اقدامات پر عمل درآمد کے نتیجے میں مسئلہ کشمیر کے حل میں مدد ملے گی۔

	پاک۔بھارت مذاکرات کا یہ چوتھا دور ہے

ان کا کہنا کہ مذاکرات اسی صورت میں بامقصد اور نتیجہ خیز ثابت ہوسکتے ہیں جب ان میں کشمیری قیادت کو شامل کیا جائے۔

انہوں نے کہا کہ کشمیریوں نے کسی کو بھی اپنے مستقبل کے فیصلہ کرنے کا حق نہیں دیا خواہ وہ پرویز مشرف ہوں یا پھر شاہ محمود قریشی۔

خود مختار کشمیر کی حامی تنظیم جموں کشمیر لبریشن فرنٹ کے سربراہ نے کہا کہ ان کو ہندوستان اور پاکستان کے درمیان مذاکرات سے کوئی امید نہیں۔

انہوں نے کہا کہ ہم ہندوستان اور پاکستان کی حکومتوں کو واضع کرنا چاہتے ہیں کہ ہمیں کشمیر کی تقسیم کسی بھی صورت منظور نہیں۔

بھارت کے زیر انتظام کشمیر میں برسرپیکار کئی کشمیری عسکری تنظیموں کے اتحاد متحدہ جہاد کونسل نے بھی وزرائے خارجہ کے درمیان بات چیت کو بے معنی اور غیر حقیقت پسندانہ طرز عمل ہے۔

متحدہ جہاد کونسل کے سربراہ سید صلاح الدین نے اپنے بیان میں کہا کہ کشمیری عوام کو پاک بھارت دو طرفہ مذاکرات سے پہلے کوئی امید تھی اور نہ ہی اب ہے ۔

گذشتہ آٹھ برسوں سے جاری امن کے عمل کے نتیجے میں کشمیریوں کو کوئی راحت نہیں ملی بلکہ ساڑھے سات لاکھ بھارتی فوج کی طرف سے کشمیری عوام پر مظالم میں اضافہ ہوا۔ سید صلاح الدین

انہوں نے کہا ’گذشتہ آٹھ برسوں سے جاری امن کے عمل کے نتیجے میں کشمیریوں کو کوئی راحت نہیں ملی بلکہ ساڑھے سات لاکھ بھارتی فوج کی طرف سے کشمیری عوام پر مظالم میں اضافہ ہوا۔‘

انہوں نے کہا کہ ایک طرف مذاکرات کا ڈھونگ رچایا جا رہا ہے اور دوسری جانب بھارتی افواج کی طرف سے کشمیری قوم پر ظلم وجبر’قتل وغارت‘ آبروریزی اور گھیراؤجلاؤ جاری ہے۔

’ بھارت مسئلہ کشمیر کو حل کرنے میں سنجیدہ اور مخلص نہیں بلکہ وہ وقت حاصل کرنا چاہتا ہے تاکہ کشمیریوں کی تحریک دم توڑ جائے۔‘

انہوں نے مزید کہا ’ بھارت دنیا کے آنکھوں میں دھول جھونک رہا ہے کہ مسئلہ کشمیر ہندوستان اور پاکستان کا معاملہ ہے اور اس کے حل کے لئے دو طرفہ مذاکرات ہورہے ہیں۔‘

سید صلاح الدین نے کہا کہ وہ پاکستان کی حکومت سے یہ توقع رکھتے ہیں کہ وہ بھارت کے ساتھ بے مقصد مذاکرات کے بجائے بنیادی مسئلہ کشمیر پر کشمیریوں کی خواہشات کے مطابق ٹھوس بنیادوں پر بامعنی اور نتیجہ خیز بات چیت کرے۔

جہاد کونسل کے سربراہ نے کہا کہ جب تک کشمیر کی متنازعہ حثیت تسلیم نہیں کی جاتی اور ہندوستان اور پاکستان کشمیری قیادت کو مذاکرات میں شامل کرکے سہ فریقی بات چیت شروع نہیں کرتے اس وقت تک دو طرفہ بات چیت بے سود اور فضول مشق ہوگی۔