ہارون رشید بی بی سی اردو ڈاٹ کام، اسلام آباد

	یہ اندازہ بھی نہیں کہ بھارت میں کتنی تعداد میں پاکستانی قید ہیں: دفترخارجہ

پیر کو ہفتہ وار بریفنگ کے دوران وزارت خارجہ کی ترجمان تسنیم اسلم کا کہنا تھا کہ سال دو ہزار تین سے لے کر اب تک پاکستان اٹھائیس سو سے زائد بھارتی قیدی جن میں دو سو چونٹسھ سویلین اور پچیس سو انسٹھ ماہی گیر تھے، رہا کر چکا ہے۔ اس کے مقابلے میں بھارت، ترجمان کا کہنا تھا، صرف آٹھ سو تیئس افراد جن میں تین سو چھیاسی سویلین تھے رہا کیئے ہیں۔

تسنیم اسلم نے شکایت کی کہ بھارت پاکستانی قیدیوں سے پاکستانی سفارت خانے کے عملے کو ملاقات کی بھی اجازت نہیں دے رہا ہے۔ ان کا کہنا تھا کہ کئی ایسے پاکستانی اپنی قید کی مدت بھی مکمل کر چکے ہیں لیکن انہیں رہا نہیں کیا جا رہا ہے۔

ایک سوال کے جواب میں ترجمان وزارت خارجہ کا کہنا تھا کہ انہیں یہ اندازہ بھی نہیں کہ بھارت میں کتنی تعداد میں پاکستانی قید ہیں۔ ترجمان نے بتایا کہ گزشتہ ماہ پاک بھارت مذاکرات میں بھی اس معاملے کو اٹھایا گیا تھا تاہم اس میں کوئی پیش رفت نہیں ہوئی۔ پاکستان ن نے گزشتہ ہفتے بھی ایک سو چونتیس بھارتی واہگہ کے راستے رہا کیئے تھے۔ اس کے بدلے بھارت نے ستر رہا کیئے جوکہ بقول پاکستان طے شدہ تعداد سے اننچاس کم تھے۔

بھارت کے جوہری تجربے کی اطلاعات کے بارے میں ترجمان کا کہنا تھا کہ ایسا ہونے کی صورت میں پاکستان بھی اپنی جوہری تجربات نہ کرنے کی پالیسی پر ازسرنو جائزہ لے سکتا ہے۔