علی سلمان بی بی سی اردو ڈاٹ کام لاہور

	رہا ہونے والے میں بیشتر مچھیرے ہیں جو سمندر میں راستہ بھٹک گئے تھے

قیدیوں کی یہ رہائی دونوں ملکوں کے درمیان اعتماد سازی کےاقدام کے طور پر عمل میں آئی ہے۔ ہندوستانی قیدیوں کی رہائی کے لیے سرگرم انصار برنی ٹرسٹ کے صارم برنی ان قیدیوں کی حوالگی کے موقع پر واہگہ باڈر پر موجود رہے۔

انہوں نے بتایا کہ سو مچھیروں کو کراچی کی لانڈھی جیل سے رہا کر کے خصوصی بسوں میں لاہور لایا گیا تھا۔ یہ وہ لوگ تھے جو سمندر میں مچھلیاں پکڑتے ہوئے حکام کے بقول پاکستانی حدود میں چلے گئے تھے۔

دو خواتین سمیت چونتیس ہندوستانیوں کو لاہور کی جیل سے رہا کیا گیا۔ ان میں وہ افراد شامل ہیں جنہیں غیرقانونی طور پر سرحد پار کرنے یا ویزے کی مدت ختم ہوجانے کے باوجود پاکستان میں قیام کے الزام میں پکڑا گیا تھا۔

وطن لوٹنے والوں میں اٹھائیس افراد ایسے تھے جن کی عمریں سترہ برس سے کم تھیں۔ یہ لوگ وطن جانے کے عمل کے دوران خوش دکھائی دے رہے تھے۔

	رہا ہونے والوں میں دو خواتین بھی تھیں

گذشتہ مہینے کے اوائل میں اکیاون ہندوستانی قیدی رہائی کے بعد وطن واپس چلے گئے۔اس تمام عرصے کے دوران ہندوستان سے بھی مرحلہ وار پاکستانی قیدیوں کی رہائی عمل میں آتی رہی ہے۔

دونوں ملکوں کے تعلقات میں سرد مہری کے بعد پچھلے چار برس میں ہندوستان اور پاکستان کے درمیان تین ہزار سے زائد قیدیوں کا تبادلہ ہوچکا ہے۔

مبصرین کا کہنا ہے کہ دونوں ملکوں کے قانون نافذ کرنے والے ادارے ایک دوسرے کے شہریوں کو ملک کی جغرافیائی حدود کی خلاف ورزی کے الزام میں پکڑتے رہتے ہیں اور بعد میں اعتماد سازی کے نام پر انہیں رہا کیا جاتا ہے۔

دونوں ملکوں نے ساٹھویں یوم آزادی پر ایک دوسرے کے قیدی رہا کرنے کا جو فیصلہ کیا تھا اس کے مطابق پاکستان نے اپنے یوم آزادی سے ایک دن پہلے ایک سو چونتیس قیدی رہا کیے ہیں جبکہ توقع ہے کہ ہندوستان اپنے یوم آزادی یعنی پندرہ اگست سے ایک روز پہلے ستر کے لگ بھگ پاکستانی قیدیوں کو رہا کرے گا۔