علی سلمان بی بی سی اردو ڈاٹ کام، لاہور

	رہا ہونے والوں میں بیشتر مچھیرے ہیں جو سمندر میں بھٹک گئے تھے

چودہ اگست کو واہگہ باڈر پر سترافراد کو پاکستان کے حوالے کیا گیا۔ پاکستان کی وزارتِ داخلہ کے اہلکار غلام محمد نے واہگہ بارڈر پر ذرائع ابلاغ کے نمائندوں سے بات کرتے ہوئے کہا کہ انہیں پہلے اطلاع ملی تھی کہ ہندوستان ایک سو تیرہ افراد کو رہا کرے گا لیکن منگل کی صبح 72 افراد کی فہرست موصول ہوئی اور جب رہائی کا مرحلہ آیا تو 72 کی بجائے یہی 70 لوگ رہائی پا سکے اور دو کو نامعلوم وجوہات کی بنا پر سرحد کے اس پار روک لیا گیا۔

ان قیدیوں کی رہائی دونوں ملکوں میں جاری اعتماد سازی کے اقدامات کے سلسلے کی ایک کڑی ہے۔ پاکستان نے پیر کو ہندوستان کے ایک سو چونتیس قیدیوں کو رہا کیا تھا۔ اس طرح دو روز کے دوران دونوں طرف سے مجموعی طور پر دو سو چار پاکستانی و ہندوستانی قیدیوں کو یوم آزادی کے موقع پر رہائی مل سکی ہے۔

دونوں ملکوں نے ان افراد کو اپنے اپنے ملک کی جغرافیائی حدود کی خلاف ورزی کے الزام میں گرفتار کیا تھا۔ منگل کو ہندوستان کی قید سے جو ستر افراد رہا ہوئے ہیں، ان میں سے اڑتالیس ایسے مچھیرے تھے جنہیں ہندوستانی حکام نے سمندر سے گرفتار کیا تھا اور ان پر یہ الزام عائد کیاگیا تھا کہ وہ ہندوستان کے پانیوں میں داخل ہوگئے تھے۔ باقی افراد ویزے کی مدت ختم ہونے کے بعد زائد قیام یا غلطی سے سرحد پار کر جانے کے الزام میں پکڑے گئے تھے۔

	پاکستان نے پیر کو ہندوستان کے ایک سو چونتیس قیدیوں کو رہا کیا تھا

مبصرین کا کہنا ہے کہ دونوں طرف کے سرکاری اہلکار ہر برس ایک دوسرے کے سینکڑوں افراد کو جغرافیائی حدود میں بلا اجازت داخل ہونے یا قیام پذیر ہونے کے الزام میں گرفتار کر لیتے ہیں اور بعد میں اعتماد سازی کے اقدامات کے نام پر انہیں رہا کردیا جاتا ہے۔