ارمان صابر، عبدالحئی کاکڑ، عزیز اللہ، عبادالحق بی بی سی اردو ڈاٹ کام: کراچی، پشاور، کوئٹہ، لاہور

	سرحد اسمبلی کا اجلاس دو اپریل کو طلب کیا گیا ہے

چاروں صوبوں کے گورنروں کی جانب سے جاری کیے گئے اعلانات کے مطابق سرحد اسمبلی کا اجلاس دو اپریل، سندھ اسمبلی کا اجلاس پانچ اپریل کو، بلوچستان کا اجلاس سات اور پنجاب اسمبلی کا اجلاس نو اپریل کو طلب کیا گیا ہے۔

سب سے پہلے گورنر ڈاکٹر عشرت العباد کی جانب سے سندھ اسمبلی کا اجلاس پانچ اپریل کو صبح گیارہ بجے طلب کرنے کی اطلاع آئی۔

جس کے بعد سرحد کے اجلاس کو طلب کیے جانے کی اور پھر بلوچستان اسمبلی کے اجلاس کی طلبی کی اطلاع آئی۔

تینوں اسمبلیوں کے پہلے اجلاسوں میں نو منتخب ارکان اسمبلی اپنے عہدوں کا حلف اٹھائیں گے۔

سندھ اسمبلی کے اجلاس کی صدارت سپیکر سید مظفر علی شاہ اور بلوچستان اسمبلی کے اجلاس کی صدارت جمال شاہ کاکڑ کریں گے جب کہ صوبہ سرحد میں صورتِ حال ماضی کے کئی مواقع کے مانند قدرے مختلف ہے۔

صوبہ سرحد کے سکریٹری قانون شاہد نسیم کے بقول صوبہ سرحد میں گزشتہ سال اے پی ڈی ایم کے فیصلہ کے تحت سپیکر اور ڈپٹی سپیکر کے استعفوں کے بعد گورنر سرحد نے عوامی نیشنل پارٹی کے رکن صوبائی اسمبلی ارباب ایوب جان کو نو منتخب اراکین سے حلف لینے اور ایوان کی کارروائی چلانے کے لیے نامزد کیا ہے۔

صوبہ سرحد کے ایک سو چوبیس کے ایوان میں عوامی نیشنل پارٹی پچاس اراکین کی حمایت کے ساتھ سرِفہرست ہے جب کہ دوسرے نمبر پر پیپلز پارٹی ہے جسے تینتیس اراکین کی حمایت حاصل ہے۔

صوبہ میں پیپلز پارٹی اور عوامی نیشنل پارٹی کی مخلوط حکومت بننے جا رہی ہے۔ حکومت سازی کے فارمولہ کے مطابق اے این پی کو وزارت اعلی کے علاوہ ڈپٹی سپیکر کے عہدہ کے علاوہ بارہ وزارتیں جبکہ پیپلز پارٹی کو سپیکر شپ اور نو وزارتیں دی جائیں گی۔

	بلوچستان اسمبلی کا اجلاس سات اپریل کو طلب کیا گیا ہے

سندھ اسمبلی میں مسلم لیگ ق نے دس اور مسلم لیگ فنکشنل نے سات نشتیں جیتی ہیں جبکہ عوامی نیشنل پارٹی اور نیشنل پیپلز پارٹی نے دو دو حلقوں سے کامیابی حاصل کی ہے۔ حیدرآباد کی ایک نشست پر آزاد امیدوار نے فتح حاصل کی ہے جو کہ پورے صوبے میں صوبائی اسمبلی کے حلقے سے آزاد حیثیت میں منتخب ہونے والے واحد امیدوار ہیں۔

یاد رہے کہ پاکستان پیپلز پارٹی نے صوبہ سندھ میں وزارت اعلیٰ کے عہدے کے لیے سید قائم علی شاہ کو نامزد کیا ہے جب کہ صوبائی اسمبلی میں سابق قائد حزب اختلاف نثار احمد کھوڑو کو سپیکر اور پیر مظہرالحق کو پارلیمانی لیڈر کے عہدوں کے لیے نامزد کیا گیا ہے۔

بلوچستان میں حکومت سازی کے لیے پیپلز پارٹی قاف لیگ اور دیگر تمام جماعتیں ایک ہونے کا اعلان کر رہی ہیں۔

جمعہ کو کوئٹہ میں قاف لیگ کے دیگر اراکین نے پارلیمانی لیڈر اور رکن صوبائی اسمبلی جعفر مندوخیل اور سینیٹر سعید ہاشمی کی سربراہی میں پیپلز پارٹی کی حمایت کا اعلان کر دیا جس کے بعد اس وقت تریسٹھ ارکان کے ایوان میں پیپلز پارٹی کو باسٹھ اراکین کی حمایت حاصل ہوگئی ہے۔

تاہم ابھی یہ واضح نہیں ہے کہ سپیکر اور ڈپٹی سپیکر کے عہدوں کے لیے کسے نامزد کیا جائے گا۔

گورنرپنجاب لیفٹیننٹ جنرل ریٹائرڈ خالد مقبول نے صوبائی اسمبلی کا اجلاس نو اپریل کو طلب کرلیا ہے۔گورنر پنجاب کی ترجمان کے مطابق نو اپریل طلب کئے گئے اجلاس میں پنجاب اسمبلی نومنتخب ارکان اسمبلی اپنے عہدے کا حلف اٹھائیں گے۔

پنجاب اسمبلی کے سبکدوش ہونے والے سپیکر چودھری افضل ساہی نئے ارکان صوبائی اسمبلی سے حلف لیں گے۔

پنجاب اسمبلی کا ایوان تین سو تہتر ارکان اسمبلی پر مشتمل ہے جس میں مسلم لیگ نواز کے ایک سو پینسٹھ، پاکستان پیپلز پارٹی کے ایک سو پانچ ، مسلم لیگ قاف کے چھیاسی ، مسلم لیگ فنکشنل کے چار اور متحدہ مجلس عمل کے ارکان شامل ہیں۔