رفعت اللہ اورکزئی بی بی سی اردو ڈاٹ کام، پشاور

	صوبہ سرحد میں عوامی نیشنل پارٹی اور پیپلز پارٹی پارلمینٹرینز کے مابین حکومت سازی کا فارمولہ طے پاگیا

بدھ کو پشاور میں دونوں سیاسی پارٹیوں کی مذاکراتی کمیٹیوں کا ایک اہم اجلاس منعقد ہوا جس میں دو نوں جماعتوں کے صدر اور دیگر اراکین شریک ہوئے۔

پاکستان پیپلز پارٹی پارلمینٹرینز کے صوبائی صدر رحیم داد خان نے بی بی سی کو بتایا کہ اجلاس میں دونوں جماعتوں نے حکومت سازی کے حوالے سے اپنی تجاویز اور سفارشات پیش کیں اور ان پر تفصیلی بحث کی گئی۔

انہوں نے کہا کہ اجلاس میں وزارتوں کا تعین اور ان کی تقسیم پر بھی تفصیلی بحث ہوئی۔ ان کا کہنا تھا کہ اجلاس کے فیصلوں کے مطابق سپیکر پیپلز پارٹی کا ہو گا جب کہ ڈپٹی سپیکر کا عہدہ اے این پی کو دیا جائے گا۔

اے این پی ذرائع کے مطابق کابینہ میں 21 وزراء شامل کیے جائیں گے جس میں بارہ کا اے این پی سے جب کہ نو وزراء کا تعلق پیپلز پارٹی سے ہوگا۔ اس کے علاوہ صوبائی کابینہ میں دو سینئر وزیر بھی شامل ہوں گے جس میں ایک اے این پی سے جب کہ دوسرا پیپلزپارٹی سے ہوگا۔

وزارتوں کی تقسیم کا فارمولہ کابینہ میں 21 وزراء شامل کیے جائیں گے جس میں بارہ کا اے این پی سے جب کہ نو وزراء کا تعلق پیپلز پارٹی سے ہوگا اس کے علاوہ دونوں پارٹیوں کا ایک ایک سینئر وزیر ہو گا اے این پی

واضح رہے کہ حکومت سازی کے فارمولے کے تحت وزرات اعلی کا عہدہ سرحد اسمبلی میں سب سے زیادہ نشستیں حاصل کرنے والی جماعت عوامی نیشنل پارٹی کو دیا گیا ہے جس کے لیے پارٹی کی طرف سے پہلے ہی مردان سے نو منتخب رکن سرحد اسمبلی امیر حیدر خان ہوتی کو نامزد کیا چکا ہے۔