ریاض سہیل بی بی سی اردو ڈاٹ کام، کراچی

	چونکہ یہ فلم بھارت میں بنائی گئی ہے اس لیے اسے سینسر سرٹیفکیٹ نہیں دیا جاسکتا

بچوں کے موضوع پر بنائی گئی اس فلم میں بالی ووڈ کے سٹار اداکار عامر خان نے پہلی مرتبہ بطور ہدایت کار کام کیا ہے۔ یہ فلم بھارت میں کئی ایوارڈ حاصل کر چکی ہے ۔

انڈپینڈنٹ موویز کی جانب سے پاکستان میں تارے زمین پر کی نمائش کے لیے سینسر بورڈ سے رجوع کیا گیا تھا۔

پاکستان میں مرکزی سینسر بورڈ کے چیئرمین اظفر شفقت کا کہنا ہے کہ تارے زمین پر کے مواد پر کوئی اعتراض نہیں ہے چونکہ یہ فلم بھارت میں بنائی گئی ہے اس لیے اسے سینسر سرٹیفکیٹ نہیں دیا جا سکتا۔

انہوں نے بتایا کہ وفاقی محکمہ ثقافت اور سیاحت نے یہ فیصلہ کر رکھا ہے کہ جو بھی فلم مکمل طور پر بھارت میں بنائی جائیگی پاکستان میں اس کی نمائش کی اجازت نہیں دی جائیگی۔ اگر کسی فلم کا اوریجن بھارت نہ ہو مگر اس میں بھارتی اداکاروں نے کام کیا ہو تو اس کی اجازت دی جا سکتی ہے۔

پاکستان میں اس سے قبل مغل اعظم اور تاج محل کو نمائش کی اجازت دی گئی تھی ان دونوں فلموں کی عکس بندی بھارت میں ہی کی گئی تھی۔

سینسر بورڈ کے چیئرمین اظفر شفقت کے مطابق ان فلموں کو خصوصی طور پر نمائش کی اجازت فراہم کی گئی تھی۔ ’اگر تارے زمین پر کے پروڈیوسر حکومت سے رابطہ کریں تو حکومت خصوصی اجازت دے سکتی ہے۔‘

	اگر تارے زمین پر کے پروڈیوسر حکومت سے رابطہ کریں تو حکومت خصوصی اجازت دے سکتی ہے: سینسر بورڈ

پاکستان حکومت کے موجودہ فیصلے پر موقف لینے کے لیے جب عامر خان سے دلی میں ٹیلیفون پر رابطہ کیا گیا تو ان کی سیکریٹری شلپا نے بتایا کہ وہ اپنی آنے والی فلم گجنی کی ریکارڈنگ میں مصروف ہیں۔

واضح رہے کہ پاکستان میں فلم بنانے اور اس کی نمائش کے لیے تین قوانین لاگو ہیں جن میں موشن پکچر آرڈیننس، سیسنرشپ آف فلم رولز اور سینسر شپ کوڈ شامل ہیں۔ موشن پکچر آرڈیننس میں حکومت کو یہ اختیار دیا گیا ہے کہ وہ کسی بھی فلم کو قانون سے مسثتنیٰ قرار دے سکتی ہے۔

پاکستان کے سینما گھروں میں اس وقت بھی بالی ووڈ کے ہدایت کاروں اور اداکاروں کی دو فلمیں ’ویلکم‘ اور ’کلر‘ زیر نمائش ہیں۔

تارے زمین پر کو پاکستان میں بھی بہت پسند کیا گیا ہے اور کیبل ٹی وی نیٹ ورکس پر فلم کو کئی بار دکھایا گیا ہے۔ کئی بچوں نے فلم کے چائلڈ اسٹار درشیل سفاری کا ہیئر اسٹار اپنالیا ہے۔