ہارون رشید بی بی سی اردو ڈاٹ کام، اسلام آباد

	آصف زرداری اور مخدوم امین فہیم کے حق میں نعرے لگائے گئے

سنیچر کو اسلام آباد پریس کلب کے باہر وزارتِ عظمٰی کے امیدوار اور پیپلز پارٹی کے سینئر رہنما مخدوم امین فہیم اور آصف علی زرداری کے حق میں دو الگ الگ احتجاجی مظاہرے منعقد ہوئے۔

دونوں مظاہروں کے بیک وقت منعقد ہونے کے باوجود دونوں میں کسی قسم کی تلخی نہیں دیکھی گئی۔

مخدوم امین فہیم کی حمایت میں پیپلز پارٹی کے تقریباً تیس کارکنوں نے مظاہرہ کیا۔ انہوں نے مخدوم امین فہیم کے حق میں نعرے لگائے۔ مظاہرین کا مطالبہ تھا کہ مخدوم امین فہیم جماعت کے پرانے اور سینئر رہنما ہیں لہذا انہیں اس اہم عہدے پر فائز کیا جائے۔ شرکاء نے آصف علی زرداری کے خلاف’زرداری غداری‘ جیسے نعرے بھی بلند کیے۔

عین اسی وقت پیپلز سٹوڈنٹ فیڈریشن سمیت چند دیگر اراکین پیپلز پارٹی نے بھی آصف علی زرداری کے وزیراعظم بننے کے حق میں پریس کلب کے سامنے مظاہرہ کیا۔ اس مظاہرے میں شامل افراد کی تعداد بھی پچاس کے لگ بھگ تھی جنہوں نے آصف زرداری کے حق میں’ایک زرداری سب پہ بھاری‘جیسے نعرے لگائے۔

مخدوم امین فہیم کے حق میں مظاہرہ کرنے والے گروپ کی قیادت بالاکوٹ سے اپنے آپ کو پیپلز پارٹی کا نظریاتی کارکن کہلوانے والے حافظ عبدالباسط اور شاہ جہان کر رہے تھے جنہوں نے بعد میں اٹھارہ مارچ کو پارلیمنٹ ہاوس کے باہر دھرنا دینے کا اعلان کیا۔ انہوں نے اس موقع پر اجتماعی خود سوزی کی بھی دھمکی دی۔

اگرچہ یہ بہت چھوٹے پیمانے پر ہونے والا احتجاج تھا لیکن ان سے اس معاملے پر مسائل کے بدستور موجود ہونے کے اشارے ملتے ہیں۔ سیاسی تجزیہ نگار اس خدشے کا اظہار کر رہے ہیں کہ پیپلز پارٹی کے اندر اس تقسیم کو کہیں پارٹی مخالفین جن میں ایجنسیاں بھی شامل ہوسکتی ہیں جماعت کو کمزور کرنے کے لیئے استعمال نہ کریں۔

ادھر پیپلز پارٹی نے ایک غیرمعمولی بیان میں عوام کو مطلع کیا ہے کہ وہ ان لوگوں سے ہوشیار رہیں جو آصف علی زرداری کے نام کو استعمال کرکے دفاتر میں تقرریوں و تبادلوں اور ترقیاتی کام کروانے کی کوشش کر رہے ہیں۔ جماعت کے ترجمان فرحت اللہ بابر نے کہا کہ آصف زرداری نے کسی کو ان کاموں کا اختیار نہیں دیا ہے۔ ایسے لوگوں کی شکایت کے لیے بریگیڈئر امان کو مقرر کیا گیا ہے۔