اعجاز مہر بی بی سی اردو ڈاٹ کام، اسلام آباد

	وزارت عظمیٰ کے امیدوار کا فیصلہ پارٹی کرے گی: امین فہیم

بدھ اور جمعرات کی درمیانی شب زرداری ہاؤس میں آصف علی زرداری سے عشائیے پر تفصیلی ملاقات کے بعد بی بی سی سے فون پرگفتگو کرتے ہوئےمخدوم امین فہیم نے کہا کہ ’ہمارے درمیان کوئی ڈیڈ لاک نہیں اور نہ ہی کوئی اختلاف ہے۔‘

مخدوم امین فہیم نے کہا کہ وہ اب بھی وزیراعظم کے مضبوط امیدوار ہیں اور حتمی فیصلہ پارٹی کرے گی۔

’آصف علی زرداری سے کھل کر باتیں ہوئیں، کھانا ساتھ کھایا اور آئندہ روزانہ ان سے ملاقات ہوا کرے گی۔‘

اس سے پہلے جب مخدوم امین فہیم آصف علی زرداری سے ملاقات کے لیے پہنچے توصحافیوں نےان سے بات چیت کرنے کی کوشش کی لیکن انہوں نے بات نہیں کی۔ملاقات ختم ہونے کے بعد بھی وہ میڈیا کےنمائندوں سے بات کیے بنا روانہ ہوگئے۔

ملاقات میں موجود پیپلز پارٹی کے ایک سینئر رہنما نے نام ظاہر نہ کرنے کی شرط پر بی بی سی کو بتایا کہ ’دونوں رہنماؤں کے درمیان غلط فہمیوں کے تاثر کو دور کرنے کی کوشش ہوئی ہے اور معاملات جلد ٹھیک ہوجائیں گے۔‘

واضح رہے کہ مخدوم امین فہیم اور آصف علی زرداری کے درمیاں اختلافات اس وقت سامنے آئے جب پیپلز پارٹی کی ترجمان شیری رحمٰن نے مخدوم امین فہیم کے بارے میں کہا کہ وہ بینظیر بھٹو کی ہلاکت کے فوری بعد صدر پرویز مشرف اور اٹھارہ فروری کے انتخابات کے بعد انٹیلیجنس حکام سے خفیہ ملاقاتیں کرتے رہے۔

شیری رحمٰن کے بقول امین فہیم نے ایسی ملاقاتوں کے بارے میں پیپلز پارٹی کے شریک چیئرمین آصف علی زرداری سمیت سینئر ساتھیوں کو اعتماد میں بھی نہیں لیا۔

ان اختلافات میں تیزی اس وقت آئی جب گزشتہ اتوار کو مری میں پیپلز پارٹی اور مسلم لیگ نواز کے سربراہان نے ملاقات کے بعد شراکت اقتدار کا معاہدہ کیا اور اس کے بعد میاں نواز شریف نے کہا کہ و نہیں چاہتے کہ ایسا شخص وزیراعظم بنے جس کا ’اینٹینا‘ کہیں اور ملتا ہو۔

میاں نواز شریف کے اس بیان کے بعد ان کی جماعت کے ایک رکن اسمبلی خواجہ آصف نے بھی مخدوم امین فہیم کی صدر مشرف سے ملاقات کے حوالے سے ان پر تنقید کی۔ جس پر امین فہیم نے انہیں قانونی چارہ جوئی کا نوٹس بھجوایا ہے۔