نثار کھوکھر بی بی سی اردو ڈاٹ کام، نوڈیرو

	’بابر اعوان پارٹی کی نمائندگی نہیں کرتے جبکہ مخدوم امین فہیم کا بیان درست ہے‘

یہ بات پاکستان پیپلز پارٹی کی مرکزی سیکریٹری اطلاعات شیری رحمٰن نے آج نوڈیرو میں پریس کانفرنس کرتے ہوئے کہا۔

انہوں نے کہا کہ پاکستان پیپلز پارٹی کے اندر وزیر اعظم کے عہدے پر اختلافات نہیں ہیں۔ ’وزیر اعظم کا فیصلہ پارٹی کی مجلس عاملہ کمیٹی ہی کرے گی۔‘

ان سے جب وزیر اعظم کے عہدے کے متعلق مخدوم امین فہیم اور بابر اعوان کے بیانات کے بارے میں سوال کیا گیا توانہوں نے کہا ’بابر اعوان پارٹی کی نمائندگی نہیں کرتے اور ان کا بیان ان کا ذاتی خیال ہے۔ جبکہ مخدوم امین فہیم کا بیان درست ہے کہ پارٹی کی سنٹرل ایگزیکٹو کمیٹی ہی فیصلہ کرے گی۔‘

پریس کانفرنس کرتے ہوئے شیری رحمٰن نے کہا کہ سابق وزیر اعظم بینظیر بھٹو نے اپنی وصیت تین حصوں میں بانٹی تھی۔ ’ان کی سیاسی وصیت کو اس لیے منظر عام پر لایا جا رہا ہے کہ غیر ملکی رسالے نیوز ویک نے یہ وصیت چھاپی ہے اور اس کو ہم پاکستانی ذرائع ابلاغ کے سامنے بھی لانا چاہتے ہیں۔‘

انہوں نے کہا کہ بینظیر کے شوہر آصف علی زرداری نے کبھی بھی اس وصیت کو ذاتی ملکیت نہیں کہا اور صرف وہ حصہ جو کہ ان کےخاندان، بچوں اور جائیداد کے بارے میں ہے وہ ان کی ذاتی ملکیت ضرور ہے۔

انہوں نے مزید کہا کہ بینظیر بھٹو کی کتاب آنے والی ہے جس میں انہوں نے اپنے اوپر ہونے والے حملوں کا پہلے ہی خدشہ ظاہر کیا تھا۔

ان سے جب کہا گیا کہ کراچی کے مسلح گروپ کے بارے میں وضاحت کی جائے تو انہوں نہ کہا کہ اس کا اشارہ ایم کیو ایم یا کسی اور جماعت کی طرف نہیں ہے۔ ’آپ کتاب آنے کا انتظار کریں آپ کو سب معلوم ہو جائے گا۔‘

شیری رحمٰن نے کہا کہ انہوں نے واشنگٹن میں اور رحمٰن ملک نے ناروے میں میڈیا اور سیاستدانوں سے ملاقات کی اور بینظیر بھٹو کی ہلاکت کی تحقیقات اقوام متحدہ سے کرانے پر زور دیا ہے۔