ہارون رشید بی بی سی اردو ڈاٹ کام، اسلام آباد

	الیکشن کمیشن سے ووٹر لسٹ کمپیوٹر سی ڈی پر بھی دستیاب ہے۔

الیکشن کمیشن کے سیکٹری کنور دلشاد نے بی بی سی سے بات کرتے ہوئے کہا ہے کہ گزشتہ برس اکتیس اکتوبر کو ایک ٹینڈر کی منظوری کے بعد کینیڈا کی ایک کمپنی کو یہ ذمہ داری سونپی گئی ہے۔

’یہ کوئی نئی بات نہیں ہے، جتنے کمپوٹر سرور ہیں بیرون ملک ہیں، لہذا سکیورٹی کے نقطۂ نظر سے اسے وہاں رکھا جاتا ہے۔ ووٹر فہرست کافی اہم دستاویز ہوتی ہے۔‘

اخباری اطلاعات کے مطابق انتخابی کمیشن نے مانٹریال، کینیڈا کی کرونومیجک نامی ایک کمپنی کو یہ آن لائن فہرست رکھنے کی ذمہ داری سونپی ہے۔

کمپنی کے اہلکار حئی بخاری کے مطابق پاکستان میں بجلی کا مسئلہ اکثر رہتا ہے اس لیئے یہ فہرست ان کے پاس رکھی جا رہی ہے۔ اس وجہ سے یہ فہرست صرف امریکہ، کینیڈا یا یورپ میں ہی کسی کمپنی کو دی جاسکتی تھی۔

اس کمپنی کے بارے میں ایک دلچسپ بات یہ بھی ہے کہ یہ مہندی ڈاٹ کام نامی ایک رشتے کروانے والی ویب سائٹ بھی چلاتی ہے۔

’یہ کوئی نئی بات نہیں ہے۔ جتنے کمپوٹر سرور ہیں بیرون ملک ہیں لہذا سکیورٹی کے نقطۂ نظر سے اسے وہاں رکھا جاتا ہے۔‘ پاکستان الیکشن کمیشن

الیکشن کمیشن نے اس کے ساتھ ہی منگل کو ووٹروں کی کمپوٹرائزڈ فہرستیں اپنی ویب سائٹ پر جاری کر دی تھیں۔ کوئی بھی ووٹر اب صرف اپنے شناختی کارڈ کا نمبر اور صوبہ درج کرکے اپنے ووٹ کے بارے میں اردو میں معلوم حاصل کرسکتا ہے۔

تاہم یہ معلومات فہرست کی شکل میں نہیں ہے۔ صرف شناختی کارڈ کا نمبر یا دیگر متعلقہ معلومات فراہم کر کے ہی اپنے ووٹ کی نوعیت کے بارے میں معلومات حاصل کی جاسکتی ہے۔

کنور دلشاد کا کہنا تھا کہ ووٹر فہرستیں دیگر ممالک میں بھی اسی طریقے سے جاری کی جاتی ہیں اور اسے باقاعدہ فہرست کی صورت میں جاری کرنا صروری نہیں۔ ان کا کہنا تھا کہ یہ فہرست دو سو روپے کے عوض سی ڈی کی شکل میں فراہم کی جاسکتی ہے۔

ویب سائٹ پر آٹھ کڑوڑ ووٹروں پر مشتمل دیٹا بیس دیا گیا ہے۔