اعجاز مہر بی بی سی اردو ڈاٹ کام، اسلام آباد

آٹھ جنوری کو ہونے والے عام انتخابات کو شفاف بنانے کا اعلان کرتے ہوئے پاکستان حکومت نے دنیا بھر کے مبصرین کو دعوت دی تھی کہ وہ آکر خود دیکھیں کہ انتخابات شفاف ہیں یا نہیں

امریکی سفارتخانے کی ترجمان ایلز بیتھ کولٹن نے بتایا ہے کہ پاکستان نے آٹھ جنوری کے انتخابات کے لیے آنے والے بعض عالمی مبصرین کو ویزہ کے اجراء میں درپیش مشکلات پر تشویش ظاہر کرتے ہوئے یقین دہانی کرائی ہے کہ ایسی شکایات کا فوری ازالہ کیا جائے گا۔

سنیچر کو بی بی سی کے دریافت کرنے پر انہوں نے کہا کہ امریکہ کے بعض عالمی مبصرین نے سٹیٹ ڈیپارٹمینٹ کو شکایت کی تھی کہ پاکستان کا سفارتخانہ انہیں ویزہ جاری کرنے میں غیر ضروری تاخیر کر رہا ہے۔

امریکی سفارتخانے کی ترجمان کے مطابق انہوں نے ایک ہفتہ قبل نگران وزیراعظم محمد میاں سومرو سے اس بارے میں باضابطہ شکایت کی تھی جبکہ ان کے مطابق تیس نومبر کو امریکی سینیٹروں کی صدر پرویز مشرف سے ملاقات میں بھی یہ معاملہ اٹھایا گیا۔

ایلز بیتھ کولٹن نے بتایا کہ پاکستان کے صدر اور وزیراعظم نے اس معاملے پر تشویش ظاہر کرتے ہوئے یقین دلایا ہے کہ وہ وزارتِ خارجہ کو اس بارے میں ضروری ہدایات جاری کر رہے ہیں۔

اطلاعات کے مطابق انٹرنیشنل ریپبلکن انسٹی ٹیوٹ اور بعض دیگر اداروں سے منسلک عالمی مبصرین نے ویزہ کے لیے درخواستیں دی تھیں اور انہیں ویزہ جاری کرنے میں تاخیر کی گئی ہے۔

امریکہ پاکستان میں ووٹر فہرستوں کو کمپیوٹرائز کرنے، تمام معلومات ویب سائٹ پر فراہم کرنے اور انتخابی عمل میں اصلاحات کے لیے تقریباً تین کروڑ ڈالر کی امداد دے چکا ہے

واضح رہے کہ پاکستان میں آٹھ جنوری کو عام انتخابات ہونے ہیں اور حکومت نے انتخابات کو شفاف بنانے کا اعلان کرتے ہوئے دنیا بھر کے مبصرین کو دعوت دی تھی کہ وہ آکر خود دیکھ لیں کہ انتخابات شفاف ہیں یا نہیں۔

حکومت کا یہ اعلان اس وقت سامنے آیا تھا جب پاکستان کی سیاسی جماعتوں سے انتخابات میں دھاندلی کے الزامات لگائے تھے۔ ان الزامات کے ساتھ پاکستان میں شفاف انتخابات کے لیے کام کرنے والی امریکہ کی ایک غیر سرکاری تنظیم نیشنل ڈیمو کریٹک انسٹی ٹیوٹ یعنی ’این ڈی آئی‘ نے بھی آٹھ جنوری کے انتخابات میں دھاندلی روکنے کے لیے خفیہ اداروں کا کردار محدود کرنے کی سفارش کی تھی۔

امریکہ پاکستان میں ووٹر فہرستوں کو کمپیوٹرائز کرنے، تمام معلومات ویب سائٹ پر فراہم کرنے اور انتخابی عمل میں اصلاحات کے لیے تقریباً تین کروڑ ڈالر کی امداد دے چکا ہے۔