بیورو رپورٹ بی بی سی اردو ڈاٹ کام، پاکستان

	تحریکِ انصاف کے کارکنوں نے اپنے رہنما کی رہائی کے لیے پیر کو بھی لاہور میں مظاہرہ کیا

تحریک انصاف کے سربراہ نے کہا ہے کہ اگر عدلیہ کو اس کی تین نومبر پہلی والی پوزیشن پر بحال نہ کیا گیا تو ان کی یہ بھوک ہڑتال موت تک جاری رہے گی۔

عمران خان کو پانچ روز پہلے لاہور میں پنجاب یونیورسٹی کے نیوکیمپس سے پولیس نے اسلامی جمعیت طلبہ کے تعاون سے حراست میں لے لیا تھا بعد میں ان کے خلاف انسداد دہشت گردی کی دفعات کے تحت مقدمہ درج کر کے انہیں لاہور سے ڈیرہ غازی خان کی جیل منتقل کردیا گیا۔

عمران خان کے قریبی رشتہ دار اور ان کےترجمان حفیظ اللہ نیازی نے پیر کے روز ان سے ملاقات کی اور میڈیا تک ان کا پیغام پہنچایا۔ انہوں نے بتایا کہ عمران خان نے پیر کو دو بجے کے بعد بھوک ہڑتال شروع کردی ہے جو ان کے بقول پاکستان میں پی سی او کے تحت حلف نہ اٹھانے والے ججوں کی بحالی تک جاری رہے گی۔

حفیظ نیازی کے علاوہ پارٹی کے دیگر رہنماؤں عمر سرفراز چیمہ اور سیف نیازی نے بھی ان سے جیل میں ملاقات کی۔

	عمران خان کی سابق اہلیہ جمائمہ خان نے لندن میں جنرل مشرف کے خلاف ہونے والے ایک مظاہرے میں شرکت کی تھی

عمر چیمہ نے بعد میں بی بی سی کو بتایا کہ عمران خان کا مطالبہ ہے کہ ملک سے ایمرجنسی ختم کی جائے اور ان تمام ججوں کو ان کی اس حثیت پر بحال کیا جائے جس پر وہ تین نومبر کو تھے۔

پاکستان کے چیف آف آرمی سٹاف جنرل پرویز مشرف نے ملک میں ایمرجنسی نافذ کرکے سپریم کورٹ کے چیف جسٹس سمیت اعلی عدلیہ کے تمام ججوں کو معطل کردیا تھا۔ بعد میں بعض ججوں سے پی سی او کے تحت حلف لیا گیا۔

ادھر عمران خان کی گرفتاری کے خلاف ان کے پارٹی کے کارکن روزانہ احتجاجی مظاہرہ کررہے ہیں۔پیر کو پولیس نے لاہور کی مال روڈ پر ان کے احتجاجی مظاہرے کو ناکام بنادیا اور تحریک انصاف کے آٹھ کارکنوں کو حراست میں لے لیا۔

نگران حکومت کے قیام کے بعد لاہور میں سیاسی کارکنوں کی یہ پہلی گرفتاری ہے۔

جیل کی سختیوں کےحوالے حفیظ نیازی نے بتایا کہ عمران خان کا وزن کچھ کم ہوا ہے مگر انہیں اپنی صحت سےزیادہ فکر عدلیہ کی ہے۔ان کا کہنا تھا کہ عمران خان نےانہیں بتایا ہے کہ وہ ہمیشہ سے کیمپوں میں رہنےکےعادی ہیں اور جیل کی سختیاں ان کا کچھ نہیں بگاڑ سکتیں۔

حفیظ نیازی سےجب عمران خان کےساتھ پنجاب یونیورسٹی میں بدسلوکی کے باری میں پوچھا گیا تو انہوں نےکوئی واضح جواب نہیں دیا اور صرف اتنا بتایا کہ عمران پہلے بھی پنجاب یونیورسٹی جاتے رہے ہیں اور طلبہ نےانہیں ہمیشہ سراہا ہے۔انہوں نے جماعت اسلامی یا جمیعت کا نام لینے سے گریز کیا۔

ان کےبقول عمران خان نے کہا ہے کہ وہ ججوں کی بحالی کی خاطر اسی لیے بھوک ہڑتال کر رہے ہیں کہ تمام سیاسی پارٹیوں نے ان کےبقول ججوں کو تنہا چھوڑا دیا ہے اور ہر جماعت اپنے اپنے معاملات سلجھانے میں لگ گئی ہے۔