علی حسن
بی بی سی اردو ڈاٹ کام، لاڑکانہ |  |
| | | لاڑکانہ کے علاوہ پاکستان کے بیشتر علاقوں میں پارٹی کارکنان بےنظیر کے استقبال کی تیاریاں کررہے ہیں |
لاڑکانہ پاکستان کی سیاست کا کئی عشروں سے اہم مرکز رہا ہے اور آج بھی بے نظیر بھٹو کا آبائی شہر اور میکہ ہونے کے باعث اہم ہے۔ آپ شہر میں جیسے ہی داخل ہوتے ہیں آپ کو کسی سرگرمی کا احساس ہوتا ہے۔ عمارتوں پر قدآور بینر لٹک رہے ہیں۔ ذوالفقار علی بھٹو اور بے نظیر بھٹو کی تصاویر ان پر نمایاں ہیں اور ان پر ان لوگوں کی تصاویر بھی ہیں جنہوں نے انہیں تیار کرایا ہے۔ کہیں کہیں اور بھی بینر ہیں جو صدر جنرل پرویز مشرف کے ہیں۔ ان میں بعض ایسے بھی ہیں جن پر سندھ کے وزیراعلٰی ارباب غلام رحیم اور صوبائی وزیر الطاف اُنڑ نمایاں ہیں لیکن پیپلز پارٹی کے بینروں کی تعداد کے باعث وہ دب گئے ہیں۔ ہر بڑی عمارت خواہ نجی ہو یا سرکاری، اس پر پیپلز پارٹی کا پرچم لہرا رہا ہے۔ دیواریں ہر جانب نعروں سے بھری پڑی ہیں۔ پورے شہر میں المرتضٰٰی ہاؤس جہاں بے نظیر بھٹو بڑی ہوئیں، خاموش ہے۔ اس کی دیواروں پر ان کے بھائی کی حمایت میں نعرے ہیں، بھٹو کا وارث بھٹو کے نعرے درج ہیں۔ پھر شہر کے بعض علاقے پیپلز پارٹی کے نغموں کی آوازوں سے گونج رہے ہیں۔ لوگوں کا ایک ہجوم پیدل ایک جگہ سے دوسری جگہ آ رہا ہے جس سے شہر بھر میں کسی تہوار کا تاثر پیدا ہوتا ہے۔ تین روز قبل عیدالفطر کے تہوار سے ملی ہوئی 18 اکتوبر کی تاریخ نے پیپلز پارٹی کی سرگرمی کو تہوار کا رنگ دے دیا ہے۔ لاڑکانہ سے کاروں، ویگنوں، بسوں کے کئی قافلے وقفے وقفے میں کراچی کے لیے روانہ ہو رہے ہیں۔ یہ قافلے کارکنوں پر مشتمل ہیں جو مقامی لیڈروں کے گروہ میں تقسیم ہیں۔ حاجی منور عباسی گروپ، ایاز سومرو گروپ وغیرہ وغیرہ لیکن نعرہ سب کا ایک ہی ہے ’بے نظیر آ رہی ہے، بے نظیر آ رہی ہے۔‘ آٹھ سال کی جلاوطنی ختم کر کے پاکستان آنے والی بے نظیر کو ایک بار پھر 1986 والی صورتحال کا سامنا ہے جس کے بعد ہونے والے انتخابات میں پیپلز پارٹی نے تمام بڑے بڑے برج گرا دیے تھے۔ دیکھیں 2007ء یا 2008ء میں ہونے والے انتخابات میں کیا ہوتا ہے۔ | 
اندرون سندھ استقبال کی تیاریاں
