دلاور خان وزیر بی بی سی اردو ڈاٹ کام، ڈیرہ اسماعیل خان

	رات بھر جاری رہنے والی لڑائی میں نو اہلکار زخمی بھی ہوگئے ہیں (فائل فوٹو)

مقامی انتظامیہ کے مطابق اس لڑائی میں آٹھ مقامی طالبان ہلاک ہوئے ہیں جبکہ پاکستانی فوج نے یہ تعداد تیس بتائی ہے۔

دس حملہ آور ہلاک، فوجی زخمی

پولیٹیکل انتظامیہ کے ایک افسر نے بی بی سی کو بتایا ہے کہ جنوبی وزیرستان کی تحصیل مکین کے علاقے نواز کوٹ میں باجوڑ سکاؤٹس فورس کے ایک ٹھکانے پر مقامی طالبان نے راکٹ اور خودکار ہتھیاروں سے حملے کیا۔ سکاؤٹس فورس نے بھی جوابی کارروائی شروع کی جو تمام رات جاری رہی۔

حکام کے مطابق اب تک اطلاعات کے مطابق باجوڑ سکاؤٹس فورس کے دس اہلکار ہلاک جبکہ نو زخمی ہوگئے ہیں۔

مقامی انتظامیہ کے حکام کے مطابق سکاؤٹس فورس کے جوابی کارروائی میں آٹھ افراد ہلاک ہوگئے ہیں جس کی مقامی افراد نے بھی تصدیق کی ہے۔

حکام کے مطابق نواز کوٹ کے قریب ایک پہاڑ پر بنے مورچے کو سکاؤٹس فورس نے خالی کر دیا ہے اور سکاؤٹس فورس کے تیس جوان رزمک سکاؤٹس قلعہ پہنچ گئے ہیں۔

حکام کا کہنا ہے کہ نوازکوٹ میں سکاؤٹس فورس کے مزید دس اہلکاروں سے رابطہ منقطع ہوگیا ہے جو رات کے وقت اپنے ٹھکانے سے بھاگ گئے تھے۔ حکام کو خدشہ ہے کہ ان اہلکاروں کو مقامی طالبان نے اغواء کیا ہے۔

مقامی افراد کے مطابق علاقے میں گن شپ ہیلی کاپٹروں کی پروازیں جاری ہیں اور بعض علاقوں سے مقامی لوگوں نے نقل مکانی شروع کردی ہیں۔

یاد رہے کہ اس سے قبل بیت اللہ گروپ کے مقامی طالبان نے سکیورٹی فورسز کے تین سو کے قریب اہلکاروں کو یرغمال بنا لیا ہے جن کو گیارہ گروپوں میں تقسیم کرکے مختلف علاقوں میں رکھا گیا ہے۔