دلاور خان وزیر بی بی سی اردو ڈاٹ کام، ڈیرہ اسماعیل خان

	رہا ہونے والے اہلکاروں میں کوئی فوجی اہلکار شامل نہیں

جنوبی وزیرستان کی مقامی انتظامیہ نے کہا ہے کہ سب ڈویژن لدھا سے اغواء کیے جانے والے سکیورٹی فورسز کے دو سو چالیس اہلکاروں میں سے چھ کو بدھ کے شام رہا کیا گیاہے۔

انتظامیہ کے مطابق ان اہلکاروں کو لدھا کے مقام پر مقامی طالبان نے خیر سگالی کے تحت جرگے کے حوالے کیا تھا۔ جس کے بعد جرگے نے انہیں بدھ کی شام آٹھ بجے وانا میں پولیٹکل انتظامیہ تک پہنچایا۔

پولیٹکل انتظامیہ کے مطابق جرگے نے عزم ظاہر کیا ہے کہ باقی مغوی اہلکاروں کی رہائی کے لیے کوششیں جاری رکھے گا۔ رہا ہونے والے اہلکاروں میں کوئی فوجی اہلکار شامل نہیں۔

جرگے کے مطابق ان اہلکاروں کو جرگے کے احترام میں غیرمشروط طور پر رہا کیاگیا ہے جب کہ دیگر مغویوں کی رہائی کے لیے حکومت کو کچھ شرائط پوری کرنی ہوں گی۔

یاد رہے کہ تیس اگست کو سکیورٹی فورسز کے دو سو سے زیادہ اہلکاروں کو بیت اللہ گروپ کے مقامی طالبان نے لدھا سے اغواء کر لیا تھا۔

حکومت کے مطابق مغویان کی تعداد دوسو چالیس تھی لیکن بیت اللہ گروپ کے ترجمان ذوالفقار کا دعویٰ تھا کہ تین سو اہلکاروں کو یرغمال بنایا گیا ہے۔ اب چھ اہلکاروں کی رہائی کے بعد مغویان کی تعداد دو سو چونتیس رہ گئی ہیں۔