دلاور خان وزیر بی بی سی اردو ڈاٹ کام، ڈیرہ اسماعیل خان

	جنوبی وزیرستان سے ساؤتھ وزیرستان سکاؤٹس کے سولہ اہلکاروں کو اغواء کر لیا گیا تھا

پیر کو محسود قبیلے کی تین بڑی ذیلی شاخوں پر مشتمل جرگے ’درے محسود‘ نے یقین دہانی کرائی تھی کہ مغویان کو اگلے چوبیس گھنٹوں میں رہا کرا لیا جائے گا۔

مغویان کو منگل کی صبح پہلے جرگہ کے حوالے کیا گیا اور پھر دوپہر کے وقت وانا کی پولیٹکل انتظامیہ تک پہنچا دیا گیا۔ رہائی پانے والے ہر شخص کو جرگہ کی طرف سے راویتی طور پر کپڑوں کا ایک جوڑا اور ٹوپی تحفتاً دی گئی۔

رکن قومی اسمبلی مولانا معراج الدین کا کہنا ہے کہ مغوی اہلکاروں کی رہائی غیر مشروط طور پر عمل میں آئی ہے، تاہم انہوں نے کہا کہ حکومت سے انہوں نے سراروغہ امن معاہدے کی پاسداری کا تقاضا ضرور کیا ہے۔

اس سے قبل بھی کئی مرتبہ ایسی اطلاعات سامنے آئیں کہ اغوا کاروں نے ان اہلکاروں کو رہا کرنے کا اعلان کیا ہے اور ان کی رہائی مرحلہ وار طریقے سے ہوگی لیکن ایسا نہیں ہوسکا۔

اس جرگے نے اس سے قبل اتوار کو صدر مقام وانا میں پولیٹکل ایجنٹ سے بھی ملاقات کی تھی۔ اس کے بعد پولیٹکل ایجنٹ سے منسوب ایک اخباری بیان میں یہ کہا گیا تھا کہ حکومت دس افراد کو رہا کرنے کے طالبان کے مطالبے کو مان رہی ہے۔

خودکش حملوں کی تیاری  محسود جنگجو مبینہ طور پر جن دس افراد کی رہائی کا مطالبہ کر رہے تھے اطلاعات کے مطابق انہیں حکومت نے خودکش حملوں کی تیاری یا عبداللہ محسود کے ساتھی ہونے کے الزام میں گرفتار کر رکھا ہے

تاہم جرگہ رکن سینیٹر صالح شاہ نے اس کی تصدیق نہیں کی۔ ان کا اصرار تھا کہ رہائی قبائلی جرگے کے احترام میں کی گئی ہے۔

یاد رہے کہ نو اگست کو جنوبی وزیرستان سے ساؤتھ وزیرستان سکاؤٹس کے سولہ اہلکاروں کو اغواء کر لیا گیا تھا، جن میں سے ایک کی بعد میں لاش ملی تھی۔ اس واقعہ کے دو ہفتے بعد چوبیس اگست کو لدھا کے مقام سے فوج کے ایک لیفٹیننٹ کرنل اور ان کے محافظ، ایک تحصیلدار اور صوبیدار کو بھی اغواء کر لیا گیا تھا۔

طالبان نے ہلاک کیے جانے والے سپاہی کی ویڈیو بھی عمر سٹوڈیو کے نام سے جاری کی تھی۔

جنوبی وزیرستان کے محسود جنگجو مبینہ طور پر جن دس افراد کی رہائی کا مطالبہ کر رہے تھے اطلاعات کے مطابق انہیں حکومت نے خودکش حملوں کی تیاری یا عبداللہ محسود کے ساتھی ہونے کے الزام میں گرفتار کر رکھا ہے۔