علی سلمان بی بی سی اردو ڈاٹ کام، لاہور

انسدادِ دہشت گردی کی خصوصی عدالت نے مبینہ جعلی مقابلے کے ایک مقدمہ میں اٹھارہ جولائی سنہ دو ہزار تین کو شہباز شریف کی گرفتاری کے دائمی وارنٹ جاری کیے تھے اور انہیں مفرور اشتہاری ملزم قرار دیدیا تھا

لاہور میں انسدادِ دہشت گردی کی خصوصی عدالت نے حکومت کو ہدایت کی ہے کہ سابق وزیراعلیٰ شہباز شریف کی گرفتاری کے چار سال پرانے عدالتی حکم پر سختی سے عملدرآمد کیا جائے اور انہیں گرفتار کرکے عدالت میں پیش کیا جائے۔

انسدادِ دہشت گردی کی خصوصی عدالت نے مبینہ پولیس مقابلے کے ایک مقدمہ میں اٹھارہ جولائی سنہ دو ہزار تین کو شہباز شریف کی گرفتاری کے دائمی وارنٹ جاری کیے تھے اور انہیں مفرور اشتہاری ملزم قرار دیدیا تھا۔

کبھی انکار نہیں کیا: شہباز شریف

نواز، شہباز شریف وطن واپس آ سکتے ہیں

شہباز شریف سے انٹرویو

’وہیں اتریں گے جہاں سے بھیجا گیا تھا‘

ان کا کہنا تھا کہ ’میں نے اس وقت کہا تھا کہ میں اس جھوٹے کیس کا سامنا کرنے کے لیے وطن آیا ہوں۔ مجھے گرفتاری کے وارنٹ دیں تو انہوں نےجہاز میں مجھے گرفتاری کے وارنٹ دیے۔ اس کے باوجود بھی حکومت نے لاہور ائر پورٹ سے دھوکے کے ذریعے مجھے جدہ واپس بھیج دیا‘۔

ان کا کہنا تھا کہ ’زندگی رہی تو میں پاکستان ضرور جاؤں گا اور کوئی شخص مجھے نہیں روک سکتا۔ یہ کیس جھوٹا ہے اور میں اس کا سامنا کروں گا‘۔

ان کا کہنا تھا کہ اب وہ دس ستمبر کو پاکستان جا رہے ہیں تو ’وہ جنرل پرویز مشرف، چیف منسٹر پنچاب، آئی جی پنجاب، چیف سیکرٹری پنجاب، ہوم سکیرٹری پنجاب، فیڈرل ہوم سیکریٹری اور اس وقت کے وزیراعظم کے خلاف مقدمہ درج کریں گے کہ یہ مجرم ہیں جنہوں نے مل کر انہیں واپس بھجوایا‘۔ ان کا کہنا تھا کہ وہ ٹرائل کورٹ کے جج کو بھی اس میں شامل کریں گے۔

جمعہ کو استغاثہ کے وکیل آفتاب باجوہ نے عدالت میں پیش ہوکر بتایا کہ عدالت کے دوہزار تین کے گرفتاری کےاحکامات کے باوجود شہبازشریف کو گرفتار کرنے کی بجائےسعودی عرب فرار کروا دیا گیا تھا۔

میں دس ستمبر کو پاکستان جا رہا ہوں تو میں جنرل پرویز مشرف، چیف منسٹر پنچاب، آئی جی پنجاب، چیف سیکرٹری پنجاب، ہوم سکیرٹری پنجاب، فیڈرل ہوم سیکریٹری اور اس وقت کے وزیراعظم کے خلاف مقدمہ درج کروں گا کہ یہ مجرم ہیں جنہوں نے مل کر مجھے واپس بھجوایا شہباز شریف

پبلک پراسیکیوٹر نے عدالت کو بتایا کہ یہ درست ہے کہ شہباز شریف کے جہاز نے لاہور ائر پورٹ پر لینڈ کیا تھا لیکن پھر وہ سعودی عرب بھجوادیے گئے۔

انسدادِ دہشت گردی کی عدالت کے جج نے کہا کہ شہباز شریف کی گرفتاری کے احکامات پہلے ہی جاری ہوچکے ہیں۔ انہوں نے حکومت کو ہدایت کی کہ وہ ان احکامات پر عمل درآمد کروائیں۔

آفتاب احمد باجوہ ایڈووکیٹ نے بی بی سی کو بتایا کہ انہوں نے عدالت کو شہباز شریف کی جائیداد کے بارے میں کچھ تفصیلات فراہم کیں اور استدعا کی کہ چونکہ وہ اشتہاری ہوچکے ہیں اس لیے ان کی جائیداد ضبط کرنے کے احکامات جاری کیے جائیں۔

عدالت نے بارہ ستمبر کو حکومت سے جواب طلب کرلیا ہے۔ شہباز شریف پر الزام عائد کیا گیا ہے کہ ان کی وزارت اعلیٰ کے دور میں سنہ انیس سو اٹھانوے میں مبینہ طور پر ان کے حکم پر ہونے والا ایک پولیس مقابلہ جعلی تھا۔

سبزہ زار کے علاقے میں ہونے والے اس مقابلے میں پانچ نوعمر لڑکے مارے گئے تھے۔ ان میں سے ایک صلاح الدین کے والد سعید قریشی کی رٹ پر ہائی کورٹ نے شہباز شریف اور متعلقہ پولیس اہلکاروں کے خلاف قتل کا مقدمہ درج کرنے کی ہدایت کی تھی اور تھانہ سبزہ زار میں یہ مقدمہ درج ہوگیا تھا۔

یہ تمام کارروائی اس دوران ہوئی جب شہباز شریف اپنے اہلخانہ کے ہمراہ جلاوطنی کی زندگی بسر کر رہے تھے۔ شہباز شریف نے اپنے بڑے بھائی اور سابق وزیراعظم میاں نواز شریف کے ہمراہ دس ستمبر کو پاکستان لوٹنے کا اعلان کر رکھا ہے۔

مبصرین کا کہنا ہے کہ موجودہ سیاسی صورتحال میں عدالت کی موجودہ کارروائی خاصی اہمیت کی حامل ہے۔