دلاورخان وزیر بی بی سی اردو ڈاٹ کام، ڈیرہ اسماعیل خان

	شوال رائفل کا قافلہ دوسلی سے میران شاہ جا رہا تھا (فائل فوٹو)

زخمی ہونے والے اہلکاروں کو ہیلی کاپیٹر کے ذریعے بنوں منتقل کردیا گیا ہے۔ میرانشاہ بازار بند لوگ خوف کے مارے گھروں میں محصور ہوکر رہ گئے ہیں۔

مقامی پولیٹکل انتظامیہ کے ایک افسر نے بی بی سی کو بتایا کہ پیر کی صبح آٹھ بجے کے قریب شوال رائفل کا ایک قافلہ دوسلی سے میران شاہ جا رہا تھا کہ ایشاء کے قریب قافلے کی ایک گاڑی بارودی سرنگ سے ٹکرا گئی جس کے نتیجہ میں ایک زوردار دھماکہ ہوا۔ دھماکے میں شوال رائفل کے چھ اہلکار زخمی ہوگئے۔

پولیٹکل انتظامیہ نے بتایا ہے کہ دس گاڑیوں پر مشتمل قافلے میں اٹھاون اہلکار سفر کر رہے تھے۔

بارودی سرنگ کے دھماکے کے بعد شوال رائفل نے جوابی کاروائی کی جس کے نتیجہ میں ایک مشکوک گاڑی سمیت سات افراد کو گرفتار کرلیا ہے۔گرفتار ہونے والے افراد کا تعلق مقامی قبائل سے بتایا جاتا ہے جن کو پوچھ گچھ کے لیے میرانشاہ سکاؤٹس قعلہ منتقل کردیا گیا ہے۔

ادھر میرانشاہ میں مقامی لوگوں کا کہنا ہے کہ اس واقعہ کے بعد علاقے میں گن شیپ ہیلی کاپٹروں نے پروازیں شروع کر دی ہیں اور وقفہ وقفہ سے فائرنگ بھی کر رہے ہیں۔

ہیلی کاپٹروں سے فائرنگ کی وجہ سے لوگوں میں زبردست خوف ہراس پھیل گیا اور میرانشاہ بازار میں لوگ دکانیں بند کر کےگھروں میں محصور ہوگئے ہیں۔

یاد رہے کہ شمالی وزیرستان میں مقامی طالبان اور حکومت کے مابین امن معاہد ٹوٹنے کے بعد فوجی قافلوں پر حملوں میں تیزی آئی ہےاور خاصہ دار فورس کی ایک بڑی تعداد نے ڈیوٹی کرنے سے انکار کردیا ہے۔ مقامی لوگوں کے خیال میں خاصہ دار فورس کی ڈیوٹی سے انکار کی وجہ مقامی طالبان کی جانب سے دھمکی کا نتیجہ ہے۔

امن معاہدہ ٹوٹنے کے بعد مقامی طالبان نے دھمکی دی تھی کہ اگر خاصہ دار فورس نے ڈیوٹیاں نہیں چھوڑیں تو وہ بھی خودکش حملوں کا نشانہ بن سکتے ہیں۔