ہارون رشید بی بی سی اردو ڈاٹ کام،اسلام آباد

چوہدری شجاعت حسین ان مذاکرات کی قیادت کریں گے جن میں علما کو بھی شریک کیا جائے گا

لال مسجد آپریشن: خصوصی ضمیمہ

لال مسجد آپریشن، ایک ہفتہ مکمل

’سیزفائر کریں اور بیٹھ کر بات کریں‘

لال مسجد کے طلباء کی رہائی

ایس ایس جی کمانڈو کرنل ہلاک

رشتہ داروں کی پریشانی

سرکاری ذرائع کے مطابق حکمراں جماعت مسلم لیگ (ق) کے سربراہ چوہدری شجاعت حسین ان مذاکرات کی قیادت کریں گے جن میں علما کو بھی شریک کیا جائے گا۔

	لال مسجد میں محصور افراد کے رشتہ دار مسجد کے باہر مودجودہ بحران کے پرامن حل کے لیے دعائیں کر رہے ہیں

ادھر وفاق المدارس العربیہ پاکستان کے ایک وفد نے پیر کو وزیر اعظم شوکت عزیز سے تفصیلی ملاقات کی اور لال مسجد کے مسئلے کے پرامن حل کے لیے مصالتی کوششوں کی پیشکش کی جس پر تنظیم کے سیکریٹری جنرل حنیف جالندھری کے بقول حکومت نے اتفاق کیا ہے۔

بی بی سی سے بات کرتے ہوئے حنیف جالندھری نے بتایا کہ ’ملاقات کافی تفصیلی کھلے ماحول میں ہوئی اور تمام آپشنز پر تفصیلی گفتگو ہوئی اور اتفاق رائے سے طے پایا کہ وفاق المدارس اور علماء نے مصالحت کی جو کوششیں شروع کی ہیں ان کو آگے بڑھایا جائے اور اس مسئلے کا پرامن حل نکالا جائے‘۔

انہوں نے بتایا کہ ملاقات میں یہ بھی طے پایا کہ ’ہم لال مسجد کی انتظامیہ سے رابطہ کریں گے اور مولانا عبدالرشید غازی سے اس سلسلے میں بات چیت کرنے کی کوشش کررہے ہیں‘۔ انہوں نے کہا کہ ’جتنے بھی آپشنز اس وقت زیر غور ہیں وہ حتمی اور قطعی اسی صورت میں بنیں گے جب فریقین کا ان پر اتفاق ہوگا اور وہ حکومت اور مولانا عبدالرشید غازی دونوں کے لئے قابل قبول ہوں گے‘۔

	عبدالرشید غازی کہہ چکے ہیں کہ وہ صرف اسی صورت میں ہتھیار ڈالنے پر تیار ہوں گے اگر انہیں ’محفوظ راستہ‘ فراہم کیا جائے گا

حنیف جالندھری نے کہا کہ حکومت نے جن آپشنز پر ان سے اتفاق کیا ہے انہیں منظر عام پر لانا فی الوقت مناسب نہیں ہوگا اور اس سے مصالحت کی کوششوں کو نقصان پہنچ سکتا ہے۔

انہوں نے کہا کہ اب جبکہ سپریم کورٹ نے بھی اس مسئلے کا از خود نوٹس لے لیا ہے تو اب اس کا بھی انتظار ہے کہ عدالت کیا کارروائی کرتی ہے اور اس سے کیا صورتحال بنتی ہے۔

لال مسجد آپریشن کے آغاز سے اب تک لڑائی میں کم سے کم بائیس افراد ہلاک ہوئے ہیں۔ اتوار اور پیر کی درمیانی شب بھی سکیورٹی فوسرز اور لال مسجد میں محصور افراد کے درمیان ساڑھے بارہ سے ڈھائی بجے کے درمیان ہلکی فائرنگ کا تبادلہ ہوا تاہم اس کے بعد خاموشی چھا گئی۔

سکیورٹی اہلکاروں نے کئی مرتبہ لاؤڈ سپیکروں پر لال مسجد کے اندر افراد سے ہتھیار ڈالنے اور اپنے آپ کو قانون کے حوالے کرنے کو کہا۔ اطلاعات کے مطابق رات کو مسجد کے اوپر ایک چھوٹا طیارہ بھی محوِ پرواز رہا۔

اس سے قبل اتوار کو سکیورٹی حکام نے جی سِکس کے علاقے میں واقع پریس کلب کو اپنے کنٹرول میں لے کر سربمہر کر دیا تھا اور وہاں موجود ان چند صحافیوں کو چلے جانے کے لیے کہا جو براہ راست صورتحال پیش کر رہے تھے۔ پریس کلب اس علاقے میں واقع ہے جہاں کرفیو نافذ ہے۔

ادھر آبپارہ تھانے میں مولانا عبدالرشید غازی اور ان کے ساتھیوں کے خلاف کمانڈو گروپ کے لیفٹننٹ کرنل ہارون اسلام کے قتل کا مقدمہ درج کر لیا گیا ہے۔ لیفٹننٹ کرنل ہارون اسلام دورانِ آپریشن ہلاک ہوگئے تھے۔