امداد علی سومرو لاہور

	ہم ایک سو سال سے زائد عرصہ سے یہ زمین کاشت کر رہے ہیں: مزارعین

اتوار کو انجمن مزارعین کے زیر اہتمام ملٹری فارم سے ملحقہ ایک دیہات جیندرہ پنڈ میں منعقد کیے جانے والے ایک جلسہ سے خطاب کرتے ہوئے مزارعین کے نمائندوں نے کہا کہ انہوں نے زمین پر فوج کے مبینہ قبضہ کے خلاف جدوجہد شروع کر دی ہے۔

جلسہ میں یہ اعلان کیا گیا ہے کہ مزارعین کسی بھی صورت میں زمین کا قبضہ کسی بھی ادارے کو نہیں دیں گے ’چاہے وہ فوج ہی کیوں نہ ہو۔‘

اس سے قبل اوکاڑہ ملٹری فارم کے مزارعین نے بھی وہاں سے بے دخل کیے جانے کے خلاف ایک طویل تحریک چلائی تھی۔ دو ہزار ایک شروع ہونے والی یہ تحریک دو ہزار پانچ تک جاری رہی تھی جس میں رینجرز کے ہاتھوں مبینہ طور پر مزارعین کی ہلاکتیں بھی ہوئی تھیں۔ مزارعین کی تحریک کے زور پکڑنے کے بعد حکومت نے رینجرز کو دو ہزار پانچ میں مزید کارروائیوں سے روک لیا تھا اور تقریباً پانچ ماہ قبل وہاں سے رینجرز کو بھی واپس بلا لیا گیا۔

انجمن مزارعین لاہور کے اس جلسہ میں علاقے کے دیہاتوں کے مزارعین نے خطاب کیا اور کہا کہ وہ ایک سو سال سے زائد عرصہ سے یہ زمین کاشت کر رہے ہیں اور اب کسی کو بھی یہ حق حاصل نہیں ہے کہ انہیں بے دخل کرے۔

	ہم صرف اپنے حق کیلئے اٹھ کھڑے ہوئے ہیں: محمد اشرف

انہوں نے کہا کہ فارم اور ڈیفینس ہاؤسنگ اتھارٹی والوں کی باتیں سن سن کر ہم تحریک چلانے پر مجبور ہو گئے ہیں۔ ’وہ کبھی ڈی ایچ اے کے لئے ہماری زمینوں سے بڑی سڑک نکالنے کی باتیں کرتے ہیں اور کبھی ہمارے گاؤں مسمار کر کے ڈی ایچ اے کی توسیع کی باتیں کی جاتیں ہیں۔

محمد اشرف نے کہا: ’ہمیں فوج کی نیت کا پتہ ہے۔ ہم نے اگر ان کو راستہ بنانے کے لئے اپنی زمین دی تو وہ تمام مزارعین کو بے دخل کر کے 13 ہزار ایکڑ زمین پر قبضہ کر لی گی۔‘

انجمن مزارعین کے صدر نے مزارعین کو متحد ہونے کی ہدایت کرتے ہوئے انہیں سیدھی سادی پنجابی زبان میں کئی مثالیں بھی سنائیں اور کہا کہ اگر وہ متحد رہے تو پھر زمین اور گاؤں بھی ان کے ہی رہیں گے۔ ان کے بقول ’اگر ہم لالچ یا دھمکیوں میں آ گئے تو فوج ہمیں ایک ایک کر کے مار دی دے گی اور ہمیں تدفین کیلئے زمین کا دو گز ٹکڑا بھی نصیب نہیں ہوگا۔‘

	لیز کی معیاد 2005ء میں ختم ہو چکی ہے: حاجی محمد حنیف

ان کے بقول فوجی ہر قیمتی زمین پر قابض ہو جاتے ہیں اور اب ان کی نظر ان کی زمینوں پر لگی ہوئی ہے۔

لاہور ملٹری فارم شمالی چھاؤنی کے ساتھ برکی روڈ پر واقع ہے اور یہ سات قدیم دیہاتوں پر مشتمل ہے جن میں جیندرہ پنڈ، بھگوان پورہ،. چک بُرج، چک پدری، چک دھوروالہ،. چک رکھٹیڑہ اور چک حبیب اللہ شامل ہیں۔

انجمن مزارعین کے چیئرمن حاجی محمد حنیف کے مطابق پنجاب حکومت کی ملکیت 13 ہزار ایکڑ زمین فوج نے 99 سال کی لیز پر لی تھی جس کی معیاد 2005ء میں ختم ہو چکی ہے۔ اس کے باوجود فوج فارم کی زمین پر قبضہ کرنا چاہتی ہے۔

ان کا کہنا تھا کہ فوج نے جیندرہ پنڈ کے قریب کی دس سے پندرہ مربع زمین پر پہلے ہی قبضہ کر کے اسے لاہور چھاؤنی میں شامل کر لیا ہے اور اب مزید زمین پر قبضے کے لئے ملٹری فارم کے ساتھ مل کر مختلف سکیمیں بنائی جا رہی ہیں لیکن ان کی اصل سکیم ڈیفینس ہاؤسنگ اتھارٹی کی توسیع ہے۔

حاجی محمد حنیف کے مطابق ڈی ایچ اے فیز پانچ، چھ اور سات کی توسیع میں پنڈ جیندرہ رکاوٹ بنا ہوا ہے ۔ فیز پانچ اس گاؤں کے مغرب میں فیز چھ گاؤں کے مشرق میں جبکہ فیز سات اس گاؤں کے جنوب میں آتے ہیں۔ ڈی ایچ اے والے جیندرہ پنڈ پر قبضہ کرنا چاہتے ہیں جسکے بعد باقی چھ دیہاتوں کے مزارعین کو بے دخل کرنے میں ان کو آسانی ہو جائے گی۔

چیئرمین کا کہنا تھا: ’ ہم ریونیو بورڈ پنجاب سے لے کر سپریم کورٹ تک فوج کے مقابلے میں کیس جیتتے آئے ہیں اور پنجاب حکومت بھی ہمیں مزارعہ تسلیم کر چکی ہے لیکن اس کے باوجود فوج ہمیں تنگ کر رہی ہے۔ روینیو بورڈ نے تو انیس سو چھیانوے میں ہمیں یقین دلایا تھا کہ فوج کی لیز ختم ہونے کے بعد ہمیں مالکانہ حقوق دیئے جائیں گے لیکن اب فوجی حکومت کی وجہ سے ایسا ممکن نہیں ہوا حالانکہ فوج کی لیز ختم ہوئے بھی دو سال ہو چکے ہیں۔‘