بیورو رپورٹ بی بی سی اردو ڈاٹ کام، اسلام آباد

	پاکستانی قانون نافذ کرنے والے اداروں نے راشد رؤف کو اگست میں گرفتار کیا تھا

راشد رؤف کے وکیل حبیب حشمت نے بی بی سی اردو ڈاٹ کام کو بتایا ہے کہ رٹ پٹیشن راشد رؤف کے ماموں ظہور اختر کی طرف سے دائر کی گئی ہے۔

’راشد رؤف لو، بلوچ قوم پرست دو‘

درخواست برطانوی اخبارگارڈین میں شائع ہونے والی ایک خبر کی بنیاد پر دائر کی گئی ہے۔

گارڈین نے دعویٰ کیا تھا کہ برطانوی حکومت دہشت گردی کے الزام میں گرفتار راشد رؤف کی حوالگی کے لیے حکومت پاکستان سے خفیہ بات چیت کر رہی ہے۔

خفیہ مذاکرات  برطانوی حکومت دہشت گردی کے الزام میں گرفتار راشد رؤف کی حوالگی کے لیے حکومت پاکستان سے خفیہ بات چیت کر رہی ہے گارڈین

اخبار کا یہ بھی کہنا تھا کہ راشد رؤف کی حوالگی کے بدلے پاکستانی حکومت چاہتی ہے کہ برطانیہ میں مقیم بلوچ قوم پرستوں کو اس کے حوالے کر دیا جائے۔ان لوگوں کی تعداد آٹھ تک بتائی گئی ہے اور پاکستانی حکومت کا الزام ہے کہ بلوچستان میں جاری شورش میں ان کا ہاتھ ہے۔

رٹ پٹیشن میں قومی اور بین الاقوامی میڈیا میں چھپنے والی ان خبروں کے حوالے سے کہا گیا ہے کہ حکومت راشد رؤف کو برطانیہ کے حوالے کرنے کے لیے بات چیت کر رہی ہے۔

ایڈووکیٹ حشمت حبیب کا کہنا تھا کہ عدالت سے استدعا کی گئی ہے کہ اگر حکومت کے پاس اس نوعیت (مطلوب افراد کے تبادلے) کی حوالگی کی کوئی درخواست آئی ہے تو اس کی ایک نقل انہیں بھی مہیا کی جائے۔

حبیب حشمت کے مطابق عدالت عالیہ سے درخواست کی گئی ہے کہ اس پٹیشن کے فیصلے تک حکومت کو راشد رؤف کو برطانیہ کے حوالے کرنے سے روکا جائے۔

	اگست 2006 میں لندن کے ہیتھرو ایئر پورٹ پر ہنگامی حالات کا اعلان کر دیا گیا تھا

رٹ درخواست میں حکومت سے یہ بھی مطالبہ کیا گیا ہے کہ راشد رؤف کی اہلیہ اور بچوں کو ماہانہ پچاس ہزار روپے الاؤنس دے۔

راشد رؤف کو امریکہ اور برطانیہ کے درمیان پرواز کرنے والے طیاروں کو فضا میں ہی اڑانے کی مبینہ منصوبہ بندی کے الزام میں گزشتہ سال اگست میں گرفتار کیا گیا تھا۔

پچیس سالہ راشد رؤف کے خلاف انسداد دہشت گردی کی ایک عدالت میں مقدمہ قائم کیا گیا تھا، لیکن عدالت نے دسمبر میں کیے گئے ایک فیصلے میں ان کے خلاف انسداد دہشت گردی کے قانون سے متعلقہ دفعات ختم کرنے کا اعلان کیا تھا۔

تاہم بعد میں اس فیصلے کے خلاف لاہور ہائی کورٹ میں پنجاب حکومت کی طرف سے دائر کی گئی اپیل کے نتیجے میں اس پر عمل درآمد روک دیا گیا تھا۔