اعجاز مہر بی بی سی اردو ڈاٹ کام، اسلام آباد

	راشد رؤف کو برطانیہ سے امریکہ جانے والی پروازوں کو فضاء میں تباہ کرنے کے مبینہ منصوبے کے اہم ملزم سمجھا جاتا ہے

درخواست گزار ظہور اختر نے عدالت سے استدعا کی ہے کہ راشد رؤف سے ان کے اہل خانہ کو ملاقات کی اجازت دی جائے جبکہ انہیں قانونی اور طبی امداد کی فراہمی کو بھی یقینی بنایا جائے۔ انہوں نے مزید استدعا کی کہ راشد رؤف کو عدالت کی حدود سے باہر منتقل کرنے پر بھی پابندی عائد کی جائے۔

اس آئینی درخواست میں وزارت داخلہ اور وزارت خارجہ کے علاوہ ڈائریکٹر جنرل آئی ایس آئی، ڈائریکٹر جنرل انٹیلی جنس بیورو اور نیشنل کرائسس مینجمنٹ کے سربراہ کو بھی فریق بنایا گیا ہے۔

جسٹس عبدالشکور پراچہ پر مشتمل عدالت عالیہ کے ایک رکنی بنچ نے تمام مدعا علیہان کو نوٹس جاری کرتے ہوئے ہدایت کی ہے کہ وہ آئندہ سماعت تک اپنا جواب عدالت میں داخل کریں۔ عدالت نے مزید کارروائی چھ نومبر تک ملتوی کردی ہے۔

درخواست گزار کے وکیل حشمت حبیب کا کہنا ہے کہ انہوں نے عدالت کے سامنے آئین میں دیے گئے بنیادی انسانی حقوق کی خلاف ورزی کا معاملہ اٹھایا ہے۔

ان کا کہنا تھا کہ کسی بھی ملزم پر جب کسی قسم کا الزام عائد کیا جاتا ہے تواُسے عدالت میں پیش کرنا لازم ہے ہوتا ہے۔ ’جبکہ راشد رؤف کو قانونی مدد حاصل کرنے کے بنیادی حق سے محروم رکھا گیا ہے‘۔

واضح رہے کہ برطانوی شہری راشد رؤف کو پاکستانی سیکورٹی فورسز نے اگست کی ابتدا میں حراست میں لیا تھا۔ برطانیہ نے بعد میں پاکستان سے ان کی حوالگی کا مطالبہ کیا تھا۔