ریاض سہیل بی بی سی اردو ڈاٹ کام، کراچی

	ہندو برادری کے ارکان مندر کی بیرونی سیڑھیوں پر بیٹھے ہیں

کراچی میں ہندو کمیونیٹی نے مذہبی تہوار کے موقع پر احتجاج کیا ہے، ہندو کمیونٹی نے نیٹی جیٹی پل کے مندر کے باہر فوڈ سٹریٹ بنانے والی امریکی فوڈ کمپنی پر زائرین کو ہراساں کرنے کا الزام عائد کیا ہے جب کہ کمپنی نے اس کی تردید کی ہے۔

مندر مسمار، ہندوؤں کا احتجاج

نیٹی جیٹی پل کے نیچے واقع لکشمی نارائن مندر کی قریبی زمین کراچی پورٹ قاسم اتھارٹی نے ایک امریکی فوڈ کمپٹی کو دے دی ہے اور کمپنی نے اس پر بنیادی تعمیراتی کام بھی کیا ہے۔

مندر میں پیر کو ہنومان جنتی کا تہوار منایا گیا، اس موقع پر ہندو کمیونٹی کی ایک بڑی تعداد نے احتجاج کیا اور تعمیرات بند کرنے کا مطالبہ کیا۔

سابق اقلیتی ایم این اے ڈاکٹر کھٹو مل کا کہنا ہے کہ انہوں نے گرانڈ لیزر کمپنی کو خط لکھ کر مندر کے باہر کھودا ہوا گڑھا بند کرنے کا مطالبہ کیا تھا، مگر انہوں نے ایسا نہیں کیا۔

انہوں نے بتایا کہ تہوار کے سلسلے میں صبح کو جیسے ہی تنبو لگائے گئے کمپنی کے کچھ لوگ آئے اور زائرین کو ڈرایا دھمکایا گیا۔

ڈاکٹر کھٹو مل کا کہنا ہے کہ کمپنی ہندوں کو دس فٹ کےٹکڑے میں بند کرنا چاہ رہی ہے وہ کبھی بھی یہ ہونے نہیں دیں گے۔

امریکی فوڈ کمپنی گرانڈ لیزر کا کہنا ہے کہ ہندو کمیونٹی کی شکایت میں کوئی حقیقت نہیں ہے، یہ زمین کے پی ٹی کی ملکیت ہے اور کمپنی اس کی کرایہ دار ہے۔

کمپنی کے چیف ایگزیکیوٹو افسر عمران حسین کا کہنا ہے کہ مندر کے باہر
دیوار بنانے کے لیے کے پی ٹی، ہندو پنچائت اور کمپنی کے درمیان معاہدہ ہوا تھا کہ تیس فٹ جگہ چھوڑ کر یہ دیوار بنائی جائے گی کمپنی اس کے مطابق کام کر رہی ہے۔

	نیٹی جیٹی پل کے نیچے واقع لکشمی نارائن مندر کی قریبی زمین کراچی پورٹ قاسم اتھارٹی نے ایک امریکی فوڈ کمپٹی کو دے دی ہے

امریکی کمپنی نے اس تنازع کے بعد تعمیراتی کام بند کردیا ہے، عمران حسین کا کہنا ہے کہ اگر ہندو کمیونیٹی کو زمین چاہیے تو وہ کے پی ٹی سے رجوع کرسکتے ہیں وہ اس سلسلے میں کچھ نہیں کرسکتے۔