ریاض سہیل بی بی سی اردو ڈاٹ کام کراچی

	خود کش بم حملے میں حملہ آووروں کے علاوہ تین افراد ہلاک ہو گئے تھے

کراچی میں انسداد دہشت گردی کی عدالت کے جج ساغر حسین زیدی نے مدینۃ العلم خودکش بم حملے کے مقدمے میں ملزم محمد تحسین کو سزائے موت سنائی ہے۔ جب کہ الطاف حسین کو ثبوتوں کی عدم دستیابی پر شک کی بنا پر بری کردیا گیا ہے۔

کراچی میں امام بارگاہ پر خود کش حملہ

انسداد دہشت گردی کی عدالت نے اس مقدمے کا فیصلہ سات مارچ کو سنانا تھا جو سترہ مارچ تک ملتوی کیا گیا اور اس کے بعد بائیس مارچ یعنی جمعرات کی شب پونے بارہ بجے یہ فیصلہ سنایا گیا۔

اسلام آباد میں مزار بری امام پر خودکش بم حملہ کے چند روز بعد کراچی کے گلشن اقبال میں واقعہ اہل تشیع کی مسجد مدینۃ العلم پر خودکش بم حملہ کیا گیا تھا۔

تیس مئی دوہزار پانچ کو ہونے والے اس حملے میں خودکش حملہ آور اور اس کا ساتھی مارے گے تھے جبکہ ایک پولیس اہلکار اور دو نمازی ہلاک اور بائیس زخمی ہوگئے تھے۔

پولیس نے حملہ آوروں کے ساتھی محمد تحسین کو زخمی حالت میں گرفتار کرلیا تھا، جبکہ بعد میں الطاف حسین کی گرفتاری بعد میں عمل میں لائی گئی تھی۔

اس خودکش حملے کے بعد شہر میں ہنگاموں پھوٹ پڑے تھے اور نامعلوم افراد نے امریکی ریسٹورانٹ کے ایف سی کو نذر آتش کردیا تھا، جس میں سے چھ ملازمین کی دوسرے روز لاشیں ملی تھیں۔

ملزموں کو صبح کو عدالت میں لایا گیا تھا، جو فیصلے کے وقت عدالت میں موجود تھے۔