علی سلمان بی بی سی اردو ڈاٹ کام، لاہور

	اب دنیاداری اور اس کے دھندے غیر اہم لگنے لگے ہیں‘

پیغمبرِ اسلام کے کارٹونوں کا تنازعہ: خصوصی ضمیمہ

اس روز وہ آئینہ کے سامنے کھڑا اپنے بال سنوارتا رہا، پھر کہنے لگا کہ’ میں پیر صاحب کے ساتھ جا رہا ہوں۔‘

فردوس بی بی نے کہا کہ ’جب وہ پیر صاحب کے ساتھ جا رہا تھا تو میں اسے روکنے کا سوچ بھی نہیں سکتی تھی۔ وہ مجھے سلام کر کے چلا گیا اور پھر لوٹ کر نہیں آیا۔‘

اس کے والد فتح محمد نے کہا کہ ہمیں یہی بتایا گیا کہ جب وہ بینک کے سامنے سے گزرا تو بینک کے گارڈ نے فائر کر دیا اور وہ ہلاک ہوا۔

	حافظ قیصر جس مسواک سے دانت صاف کرتا تھا والدہ نے وہ بھی سنبھال کر رکھی ہے

فتح محمد نے کہا کہ محلے کے لوگ اسے شہید قرار دیتے ہیں جبکہ وزیراعلی پنجاب چودھری پرویز الہی کے حوالے سے شائع ہونے والے ایک اخباری بیان میں اسے دہشت گرد قرار دیا گیا تھا۔

فتح محمد پہلے مقامی طور پر مسلم لیگ (ق) کے کارکن تھے اور ان کے مطابق وہ مقامی ناظم کے انتخاب میں انہوں نے اپنا کردار ادا کیا لیکن جب وزیر اعلٰی نے انہی کے بچے کو دہشت گرد قرار دیا اور جب وہ چلاتے رہے کہ میرا بیٹا شہید ہے اس کا پوسٹ مارٹم نہ کرایا جائے تو کسی حکمران نے ان کی بات نہیں سنی جس پر دلبرداشتہ ہو کر وہ مسلم لیگ (ق) کو چھوڑ چکے ہیں۔

’اب میں کسی سیاسی پارٹی یا کسی بھی تنظیم میں نہیں ہوں۔ ‘

فتح محمد بات چیت روک کر نماز پڑھنے چلےگئے۔ واپسی پر اسی کمرے میں دوبارہ گفتگو کا آغاز ہوا جو کبھی حافظ قیصر کا ہوا کرتا تھا۔

	حافظ قیصر دہشت گرد یا شہید؟

حافظ قیصر چھ بہنوں کا اکلوتا بھائی تھا۔ آج بھی اس کی بہنوں نے اس کے کمرے سے اس کی زیرِ استعمال چیزیں نہیں ہٹائیں بلکہ وہ روز اس کی چیزوں پر پڑنے والی گرد صاف کردیتی ہیں۔

حافظ قیصر کے زیر استعمال رہنے والی دو مسواکیں (لکڑی کی ڈنڈیاں جن سے دانت صاف کیے جاتے ہیں )، مذہبی کتب اور نعتوں اور مذہبی تقاریر پر مبنی آڈیو کیسٹیں بھی اس کے کمرے میں موجود تھیں۔

ماں باپ دونوں ہی کئی ماہ گذر جانے کے باوجود بیٹے کی موت کے غم سے نڈھال نظر دکھائی دیتے ہیں۔ نوجوان کے والد فتح محمد نے کہا کہ جوان بیٹے کے بعد ان کی کایا پلٹ گئی ہے اب انہیں دنیا داری اور اس کے دھندے غیر اہم لگنے لگے ہیں۔

قریب ہی اس کا ڈیک ٹپ ریکارڈر موجود تھا اور چند آڈیو کیسٹیس پڑی تھیں جن میں نعتیں اور مذہبی رہنماؤں کی تقاریر تھیں۔

مسلمانوں میں دانت صاف کرنے کے لیے مسواک کا استعمال ثواب کا عمل سمجھا جاتا ہے۔

حافظ قیصر جس مسواک سے دانت صاف کرتا تھا اس کی والدہ نے وہ مسواک بھی سنبھال کر رکھی ہے۔

	بہنیں آج بھی بھائی کے کمرے کی سبھی چیزیں سلیقے اور صفائی سے رکھتی ہیں

والد فتح محمد نے بتایا کہ جب لاش گھر آئی تو پھر چندمذہبی تنظیموں کے لوگ بھی چکر لگاتے رہے۔ انہوں نے کہا کہ وہ حافظ قیصر کی تصویر مانگ رہے تھے اور اسے شائع کرنے کی اجازت طلب کرتے تھے لیکن انہوں نے انکار کر دیا تھا۔

متوفی کے والد نے کہا کہ انہوں نے ایک دوسرے ہلاک شدہ لڑکے کی تصویر پر اپنی تنظیم کا علامتی نشان اور ایک نمبر لگا رکھا تھا۔

ان کا خیال تھا کہ اگر انہوں نے اس کی اجازت دی ہوتی تو شاید ان کے بیٹے کی تصویر پر بھی نشان اورنمبر لگ جاتا۔

انہوں نے کہا کہ اسی خدشے کی وجہ سے انہیں انٹرویو دیا تھا اور نہ ہی کوئی تصویر دی کیونکہ انہیں ان کے ہمسایوں نے ڈرا دیا تھا کہ یہ لوگ ان کے بیٹے کی تصویر بیرون ملک بھجوا کر کوئی فنڈ لیں گے۔

انہوں نے کہا کہ وہ سمجھتے ہیں کہ ان کا بیٹا شہید ہے اور وہ اس کا کوئی معاوضہ نہیں لینا چاہتے۔

	کمرہ جیسے تھا ویسا ہی پڑا ہے

انہوں نے کہا کہ جس دن میرا بیٹا ہلاک ہوا اس روز وہ اکیلا اس ہجوم میں نہیں تھا، وہاں لاکھوں لوگ تھے، خود میں بھی جانا چاہتا تھا لیکن محلے سے کوئی میرا ہم عمر ساتھ دینے والا نہیں ملا ورنہ میں بھی اسی مظاہرے میں ہوتا جہاں میرا بیٹا گیا تھا اور دوسرے بے شمار لوگ تھے۔

انہوں نے کہا کہ’ وہ صرف ایک عاشق رسول تھا بالکل ایسا ہی جیسے اس شہر یا اس ملک میں رہنے والے لاکھوں کروڑوں دوسرے مسلمان ہیں۔‘

فتح محمد نے اپنے اکلوتے بیٹے کے بارے میں کہا کہ ’وہ صرف ایک حادثے کاشکار ہوا تھا اس کے علاوہ اور کچھ نہیں ۔۔۔۔۔‘