رفعت اللہ اورکزئی بی بی سی اردو ڈاٹ کام، پشاور

	حال میں حدود آرڈیننس میں ترامیم کے خلاف مظاہرے ہوئے ہیں

پشاور پریس کلب کے سامنے سڑک پر جمع ہونے والی برقعہ پوش خواتین نے پلے کارڈز اور بینرز اٹھا رکھے تھے جس پر ’تحفظ خواتین بل میں ترامیم نامنظور نامنظور، امریکہ کا جو یار ہے غدار غدار ہے‘ کے نعرے درج تھے۔

مظاہرین نے پندرہ بیس منٹ تک مسلسل ’اسامہ زندہ باد، ایٹم بم کا دوسرا نام طالبان، طالبان اور ایک آواز ایک قوت جمعیت جمعیت‘ کے نعرے بھی بلند کیے۔

مظاہرے کی قیادت جے یوآئی (ف) حلقہ خواتین شیخ آباد کی ایک خاتون رہنما دختر ایوب نے کی جبکہ جمعیت علماء اسلام کے دیگر صوبائی رہنما بھی اس موقع پر موجود تھے۔

مغربیت پر خواتین کی تنقید  پرویز مشرف کی حکومت ملک میں مغربی نظام لانے کی ناکام سازشیں اور کوششں کررہی ہے۔ پاکستانیوں کے لیے یہ نہایت افسوس کا مقام ہے کہ جو ملک اسلام کے نام پر حاصل کیا گیا تھا آج اسی میں اسلام کے خلاف قوانین بنائے جارہے ہیں۔ خاتون رہنما دختر ایوب

انہوں نے کہا: ’مغربی تہذیب کی دلدادہ خواتین کی خواہشات کو 99 فیصد باکردار خواتین پر مسلط کرنے کی اجازت ہر گز نہیں دی جائیگی اور اس ترمیم کے خلاف ملک بھر میں مظاہرے اور ریلیاں نکالی جائیں گی۔‘

دخترایوب نے زور دیکر کہا کہ ’حدود اللہ‘ میں کسی قسم کی ترامیم کی گنجائش نہیں اور باکردار مسلمان خواتین اپنے خون جگر سے اسلام، اسلامی تعلیمات اور ختم نبوت کی حفاظت کریں گی۔

خاتون رہنما کا کہنا تھا کہ آج حکمرانوں کی امریکہ نواز پالیسیوں کی وجہ سے نظریۂ پاکستان پر کاری ضربیں لگائی جارہی ہیں۔

گزشتہ چند ہفتوں میں حدود بل میں ترامیم کے خلاف پشاور میں خواتین کی جانب سے یہ دوسرا مظاہرہ تھا۔ اس سے پہلے جماعت اسلامی کے حلقہ خواتین کی طرف سے ایک مظاہرے کا انعقاد کیا گیا تھا۔