ریاض سہیل بی بی سی اردو ڈاٹ کام، کراچی

	تحقیقات کی نگرانی خود کروں گا: صدر مشرف

کراچی کے نشتر پارک میں عید میلادالنبی کے اجتماع میں ایک بم دھماکے میں ہلاک ہونے والے افراد کی تعداد اڑتالیس ہوگئی ہے۔ اس دھماکے میں اکیاسی افراد زخمی ہوئے تھے۔

دھماکہ خودکش حملہ تھا: آئی جی سندھ

صدر پرویز مشرف نے اپنے دو روزہ دورۂ کراچی کے دوران اتوار کی شب مذہبی جماعتوں کے رہنماؤں سے وزیرِاعلیٰ ہاؤس میں ملاقات کی اور انہیں اعتماد میں لیا۔

اس ملاقات میں سنی تحریک کے رہنما شاہد غوری، جے یو پی کے رکن قومی اسمبلی صاحبزادہ زبیر، جماعت اہل سنت کے شاہ تراب الحق، مفتی منیب الرحمان اور دیگر رہنما شریک تھے۔

سنی تحریک کے رہنما شاہد غوری نے بی بی سی کو بتایا کہ’ ہم نے صدر مشرف کو آ گاہ کیا کہ ایم کیو ایم کے کارکنان کی جانب سے سنی تحریک کے کارکنوں کو نشانہ بنایا جاتا ہے اور ہماری ایف آئی آر تک درج نہیں کی جاتی‘۔

	دھماکے کے بعد امن و امان کی صورتحال کے پیشِ نظر کراچی میں فوج طلب کر لی گئی تھی

انہوں نے کہا کہ تحفظ کی فراہمی کے مطالبے پر صدر مشرف نے کہا کہ انصاف کیا جائےگا۔ شاہد غوری کے مطابق ’جب ہم نے صدر سے کہا کہ ہم کب رابطہ کریں تو انہوں نے کہا کہ اب ہم خود رابطہ کریں گے‘۔

جماعت اہل سنت کے رہنما شاہ تراب الحق کا کہنا ہے کہ’ہم پولیس پر انحصار نہیں کر رہے اور ملک کی تمام انٹیلیجنس ایجنسیاں اس واقعے کی تحقیقات کر رہی ہیں۔ میں خود اس کی نگرانی کروں گا اور دن میں دو مرتبہ رپورٹ لوں گا‘۔

شاہ تراب الحق نے بتایا کہ صدر نے انہیں آگاہ کیا کہ یہ خودکش حملہ تھا اور دھماکے والی جگہ سے جو سر ملا ہے اسے اسلام آباد منگوایا گیا ہے جہاں اس کی پلاسٹک سرجری کی گئی ہے اور مختلف زاویوں سے اس کی تصاویر لی گئی ہیں۔ اب اسے نادرا کے ریکارڈ سے انہیں چیک کیا جائےگا۔ شاہ تراب نے بتایا کہ وہ فی الوقت تو مطمئن ہیں مگر اصل اطمینان تو اس وقت ہوگا جب اصل ملزمان کو گرفتار کیا جائےگا۔

	نشتر پارک بم دھماکے پر احتجاج

جے یو پی کے رہنما ایم این اے صاحبزادہ زبیر نے بتایا کہ انہوں نے صدر مشرف کو آگاہ کیا کہ سنی تحریک کے لوگوں کی صوبے میں کوئی شنوائی نہیں ہورہیں تھی، جس کے بعد انہوں نے اس مسئلے کو قومی اسمبلی میں اٹھایا اور وزیراعظم شوکت عزیز کو کہا کہ کراچی میں دہشت گردی کی جارہی ہے اور ہمارے لوگوں کو نشانہ بنایا جا رہا ہے۔

صاحزادہ زبیر کے مطابق اس سوال پر کہ اگر صدر اور وزیرِاعظم پر حملہ ہوتا ہے تو ملزمان گرفتار ہو جاتے ہیں مگر علماء کے قاتل کیوں گرفتار نہیں ہوتے تو صدر نے مسکراتے ہوئے کہا کہ ’وہ دو سال میں ہوئے تھے‘۔

صاحبزادہ زبیر کا کہنا تھا کہ نشتر پارک بم دھماکے کو اپنی جان چھڑانے کے لیئے خود کش حملہ قرار دیا جا رہا ہے، تاکہ اس مقدمے کو سرد خانے کے حوالے کیا جائے۔

واضح رہے کہ اس سے قبل وزیر اعظم شوکت عزیز نے بھی علماء اور مذہبی جماعتوں کے رہنماؤں کو تحقیقات کی نگرانی کی یقین دہانی کروائی تھی مگر وہ اس سے مطمئن نہیں تھے۔