علی سلمان
بی بی سی اردو ڈاٹ کام لاہور |  |
|  اے آر ڈی متفقہ امیدوار کھڑا کرئے گی |
لاہور سے قومی اسمبلی کے حلقہ ایک سو ستائیس سے ہونے والے ضمنی انتخابات کے غیر سرکاری اور غیرحتمی نتائج کے مطابق حکمران مسلم لیگ کے امیدوار فاروق امجد میر پونے سات ہزار ووٹوں کی برتری سے کامیاب ہوگئے ہیں۔ انہوں نے انتیس ہزار دو سو ار سٹھ ووٹ لیے تھے اور ان کے مدمقابل متحدہ اپوزیشن کے امیدوار نصیر بھٹہ نے بائیس ہزار تین سو اٹھتر ووٹ لیے۔ یہ نشت پاکستان عوامی تحریک کے قائد علامہ طاہر القادری کے استعفی کے باعث خالی ہوئی تھی انہوں نے صدر مشرف کے وردی اتارنے کا وعدہ پروا نہ کرنے کے احتجاج پر یہ استعفی دیا تھا۔ ان کا کہنا تھا کہ جب صدر جنرل مشرف وردی میں رہیں گے تو پارلیمنٹ مسلسل بے اختیار رہے گی جس کے بعد ایسی اسمبلی کے رکن ہونے کا کوئی فائدہ نہیں۔ حکومتی جماعت کے فاروق امجد میر نے لاہور کے ضلعی نائب ناظم کا عہدہ چھوڑ کر الیکشن لڑا جبکہ اے آرڈی نے مسلم لیگ نواز سے تعلق رکھنے والے نصیر احمد بھٹہ کو اپنا امیداور نامزد کیا تھا اس امیدوارکی حمایت متحدہ مجلس عمل اور تحریک انصاف نے بھی کی تھی اور قائدین نے انہیں متحدہ اپوزیشن کا امیدوار قرار دیا تھا۔ اتوار کو لاہور میں پولنگ کے دوران اگرچہ تلخ کلامی کے چند واقعات پیش آے لیکن مجموعی طور پر ماحول پرامن رہا۔ نصیر بھٹہ کی انتخابی مہم کے انچارج رکن قومی اسمبلی خواجہ سعد رفیق نے کہا کہ ووٹنگ کے دوران معاملات پر امن تھے۔ لیکن انہوں نے ووٹنگ کے بعد کے عمل پر شک و شبہ کا اظہار کیا ہے اور کہا ہے کہ جیسا کہ انہوں نے پہلے ہی کہہ دیا تھا حکومتی ذرائع نے دھاندلی کے ذریعے نتائج تبدیل کیے ہیں۔ ماضی میں بھی پاکستان کی میں ضمنی انتخابات میں زیادہ تر صوبائی حکومت کا حمائت یافتہ امیدوار ہی کامیاب ہوتے رہےہیں ۔ قومی اسمبلی کے سپیکر چوہدری امیر حسین نے دسمبر میں علامہ طاہرالقادری کا استعفیٰ منظور کیا تھا۔ | 
یہ صفحہ دوست کو ای میل کیجیئے
پرِنٹ کریں
