ریاست میں بھاری بارش اور کئی جگہوں پر سیلاب کی صورتحال سے عام زندگی بری طرح متاثر ہوئی ہے۔

دریائے کوسی پر بنے بند کے ٹوٹنے سے آنے والے سیلاب کے سبب بہار کے مدھےپورا، ارریا، سوپول اور سہرسہ سمیت پندرہ اضلاع میں تقریباً پچیس لاکھ افراد متاثر ہوئے ہیں۔

ریاست کے وزیر اعلی نتیش کمار نے سیلاب سے متاثرہ افراد کے لیے مرکزی حکومت سے ایک لاکھ ٹن اناج اور ایک ہزار کروڑ روپے کی مدد کا مطالبہ کیا ہے۔

اطلاعات کے مطابق آئندہ چند دنوں ميں وزیراعظم سیلاب سے متاثرہ علاقوں کا دورہ کر سکتے ہیں۔

ہندوستان کی فضایہ کے تین ہیلی کاپٹر بھی امدادی اشیاء تقسیم کرنے میں لگے ہوئے ہیں۔

آفات مینجمنٹ کے ایڈیشنل کمشنر نے خبر رساں ایجنسی پی ٹی آئی کو بتایا ہے کہ نیپال کے ایک گاؤں کے نزدیک بھی کوسی دریا کا بند ٹوٹ گیا ہے جہاں سے مزید پانی آ رہا ہے اور دیگر علاقوں میں بھی پانی بھر رہا ہے۔

	فضایہ کے تین ہیلی کاپٹر بھی امدادی اشیاء تقسیم کرنے میں لگے ہوئے ہیں

فوج کے ہیلی کاپٹر پچھلے سات روز سے مسلسل کھانے کی ضروری اشیاء کے پیکٹ متاثرہ افراد تک پہنچا رہے ہیں۔

بچاؤ کے لیے 200 کشتیاں اور 25 موٹر بوٹس استعمال کی جا رہی ہیں۔

متاثرہ علاقے میں آخری مرتبہ 1952 میں سیلاب آيا تھا تاہم ریاست بہار میں گذشتہ برس بھی سیلاب نے زبردست نے تبائی مچائی تھی۔

حکام کا کہنا ہے کہ اس برس سیلاب سے دسیوں ہزار ہیکٹر زمین پر موجود فصل برباد ہوگئی ہے۔

دوسری جانب بہار کی پڑوسی ریاست اتر پردیش میں جون سے اب تک شدید بارش اور سیلاب سے سات سو افراد کے ہلاک ہونے کی اطلاعات ہیں۔ حکام کا کہنا ہے کہ بیشتر اموات مکانوں کے گرنے کی وجہ سے ہوئی ہیں۔