ریاست میں بھاری بارش اور کئی جگہوں پر سیلاب کی صورتحال سے عام زندگی بری طرح متاثر ہوئی ہے۔

حکام کے مطابق کوسی ندی میں آنے والے سیلاب سے بہار کے تین اضلاع سوپول، ارریہ اور مدھیہ پورا بری طرح متاثر ہوئے ہیں۔ ان تینوں اضلاع کی سرحدیں نیپال سے ملتی ہیں۔

متاثرہ علاقے میں آخری مرتبہ 1952 میں سیلاب آيا تھا تاہم ریاست بہار میں گذشتہ برس بھی سیلاب نے زبردست نے تبائی مچائی تھی۔

حکام کا کہنا ہے کہ اس برس سیلاب سے دسیوں ہزار ہیکٹر زمین پر موجود فصل برباد ہوگئی ہے۔

متاثر علاقوں میں افراد سیلاب سے بچنے کے لیے دریا کے پشتوں، سڑکوں اور عمارتوں پر پناہ لے رکھی ہے اور بھارتی فضائیہ کے ہیلی کاپٹر متاثرہ علاقوں ميں پھنسے ہوئے افراد کے لیے خوراک کے پیکٹ گرا رہے ہيں۔ سیلاب زدہ اضلاع میں پچاس سے زیادہ امدادی کیمپ بھی بنائے گئے ہيں۔

صوبے کے وزیراعلی نتیش کمار نے اس سیلاب کو ایک آفت سے تعبیر کیا ہے۔

حکام کا کہنا ہے کہ ایک سو ستر سے زیادہ کشتیاں بھی امدادی کارروائیوں میں مصروف ہیں۔تاہم متاثرہ افراد کا کہنا ہے کہ انہیں حکومت کی جانب کوئی بھی امداد نہيں مل رہی ہے۔

سیلاب متاثرین نے ہفتے کو صوبے کے تین اعلٰی اسمبلی ارکان کو علاقے سے اس وقت باہر نکال دیا تھا جب یہ ارکان متاثرین سے ملنے کے لیے علاقے میں پہنچے تھے۔

دوسری جانب بہار کی پڑوسی ریاست اتر پردیش میں جون مہینے سے اب تک بھاری بارش اور سیلاب سے سات سو افراد کے ہلاک ہونے کی اطلاعات ہیں۔حکام کا کہنا ہے کہ بیشتر اموات بارش کی وجہ سے مکانوں کے گرنے کی وجہ سے ہوئی ہیں۔