صلاح الدین بی بی سی اردو ڈاٹ کام دلی

مبئی کے لوگ بارشوں سے مانوس ہیں لیکن اتنی بارش کا کسی نے تصور بھی نہیں کیا تھا

امدادی کام جاری ہیں لیکن خبروں کے مطابق ابھی بھی کچھ دوردراز علاقوں تک امدادی کاروائیاں نہیں شروع ہو سکی ہیں۔ اس دوران مرنے والوں کی تعداد آٹھ سو سے زیادہ ہوچکی ہے۔

بارش کے قہر سےپوری ریاست مہاراشٹر متاثر ہوئی ہے۔ لیکن ممبئی میں سنامی اور ایک ڈیم کے پھٹنے کی افواہوں سے لوگوں میں خوف و ہراس کا ماحول ہے۔ اس سلسلے میں پولیس نے دو ہجڑوں اور دو بار گرلس سمیت تقریبا ایک درجن لوگوں کوگرفتار کیا ہے۔ پولیس نے لاؤڈ اسپیکر سے اعلان کیا ہے کہ افواہوں پر دھیان نہ دیا جائے ۔ ساحلی علاقوں میں سنامی کی افواہوں سے بھگدڑ میں بائیس افراد ہلاک ہو چکے ہیں۔

انتظامیہ بارش سے متاثرہ ٹیلی کمیونکیشن اور ٹرانسپورٹ سسٹم کو بحال کرنے کی کوشش کر رہی ہے۔ کئی علاقوں میں اسکول بھی کھل گئے ہیں ۔ لیکن دور دراز علاقوں میں امدادا کاموں ميں ابھی کافی مشکلات کا سامنا ہے۔ سرکاری اعداد و شمار کے مطابق تقریبا چالیس گاؤں ابھی بھی باقی ریاست سے منقطع ہیں۔

متاثرہ لوگوں کو کھانہ پہونچانے کے لیے فضائی خدمات کا سہارہ لیا جارہا ہے۔ ملیریا، اسہال اور دیگر وبائی امراض کے لیے طّبی سہولیات فراہم کی جارہیں ۔ لیکن سیلاب اتنے بڑے پیمانے پر ہے کہ یہ تمام انتظامات نا کافی ہیں۔

ادھر ناندیڑ میں دریائے گوداوری خطرے کے نشان سے اوپر بہہ رہا ہے۔ اسکے پاس بسنے والے ہزاروں لوگ اپنا گھر بار چھوڑ کر محفوظ مقامات پر چلے گئے ہیں۔ ایسے کئی علاقے ہیں جہاں پانی کی زیادتی کے سبب لوگوں کو اونچے مقامات پر ٹھہرایاگیا ہے۔

ساحل سمندر سے متصل ممبئی میں عام طور پر بارش زیادہ ہوتی ہے لیکن اس برس اسکے تمام ریکارڈ ٹوٹ گئے ہیں۔ پورا شہر پانی کی ذد میں ہے۔ بارش بند ہو چکی ہے لیکن آسمان میں چھائے کالے بادلوں سے لوگوں میں اب بھی تشویش ہے۔ محکمہ موسمیات کا کہنا ہے کہ ابھی مزید بارش کے آثار ہیں۔

ریاستی حکومت کا کہنا ہے کہ وہ وبائی امراض پر قابو پانے کی ہر ممکن کوشش کر رہی ہے۔ ڈاکٹروں کی بہت سی ٹیمیں بھیجی گئی ہیں جو لوگوں کو گھر گھر دوا پہنچا رہی ہیں۔ حکومت نے یونیسیف سے بھی مدد مانگی ہے۔