ممبئی کا ایک تہائی حصہ پانی میں ڈوب چکا ہے

اس میں سے آدھے سے زیادہ صرف ممبئی میں ہلاک ہو چکے ہیں۔ شہر سے تمام پروازیں منسوخ کر دی گئی ہیں اور بدھ کے روز سٹاک مارکیٹ پر ٹریڈنگ بھی نہیں کی گئی۔ بحریہ کے فوجی امدادی کاموں میں مصروف ہیں۔

ہلاک ہونے والوں کی زیادہ تعداد دیواریں گرنے کی وجہ سے ہوئیآ اس کے علاوہ لوگ کاروں میں پھنس کر اور کرنٹ لگنے کی وجہ سے ہلاک ہوئے۔

حکام کے مطابق منگل کو ہونے والی بارش سب سے زیادہ تھی اور اس نے ایک روز میں سب سے زیادہ بارش کا انڈیا کا ریکارڈ توڑ دیا ہے۔ صرف ممبئی میں ہی 65 سینٹی میٹر یعنی 26 انچ سے زیادہ بارش ہوئی۔

ریاست مہاراشٹر میں بارش سے سب بہت تباہی ہوئی ہے اور ممبئی میں ہنگامی صورتحال کا اعلان کر دیا گیا ہے۔

ممبئی میں بی بی سی کے نمائندے زبیر احمد کا کہنا ہے کہ شہر کی سڑکیں گاڑیوں سے بھری پڑی ہیں جن میں سوار افراد نے ان میں ہی رات گزاری۔ بھارتی محکمہ موسمیات نے اڑتالیس گھنٹوں میں مزید بارشوں کی پیشین گوئی کی ہے۔ دوسری طرف ریاستی حکومت نے عوام سے اپیل کی ہے کہ وہ گھروں میں رہیں اور اپنے اپنے کاموں پر نہ جائیں۔

شہر میں ہزاروں افراد مختلف مقامات پر پھنسے ہوئے ہیں۔ امدادی ٹیموں نے ان مصیبت زدہ افراد میں کھانا اور صاف پانی کے پارسل تقسیم کرنے شروع کر دیے ہیں۔

محکمہ موسمیات کے مطابق بارش کا یہ سلسلہ جمعہ کو بھی جاری رہے گا۔

بدھ کو ممبئی میں ہونے والی تباہی
نائب وزیر اعلیٰ پی آر پاٹل نے بتایا ہے کہ یہ ممبئی کسی ایک دن کے دوران ہونے والی ریکارڈ بارش ہے۔

اس سے پہلے ریاست کے وزیرِاعلی ولاس راؤ دیش مکھ کا کہنا تھا کہ اتوار سے اب تک 99 افراد کے ڈوبنے یا ہلاک ہونے کی تصدیق ہو چکی ہے۔ ان کا بھی کہنا تھا کہ آج تک بھارت میں ایک دن میں کبھی اتنی بارش نہیں ہوئی۔

وزیرِاعلیٰ نے ریاست میں عام تعطیل کا اعلان کر دیا ہے اور سکول اور دفاتر بند کر دیے گئے ہیں۔ ان کا کہنا تھا کہ ان بارشوں سے مہاراشٹرا کو اندازاً ایک سو دس ملین ڈالر کا نقصان پہنچا ہے۔

ریاست میں زیادہ تر اموات رائے گڑھ اور رتناگری کے اضلاع میں ہوئیں۔ امدادی کارروائیوں کے سربراہ کرشنا وستا نے خبر رساں ادارے رائٹرز کو بتایا کہ’ ہم ابھی تک کچھ علاقوں میں پہنچنے میں کامیاب نہیں ہو سکے ہیں جبکہ درجنوں افراد مٹی کے تودے گرنے سے ہلاک ہو چکے ہیں‘۔

مہاراشٹر کے دارالحکومت ممبئی میں بیس افراد کے ہلاک ہونے کی اطلاع ہے۔ شہر کا ایک تہائی حصہ پانی میں ڈوب چکا ہے۔ محکمہ موسمیات کا کہنا ہے کہ ممبئی میں منگل کو چھبیس انچ بارش ہوئی۔

ممبئی آنے جانے والی تمام پروازوں کو منسوخ کر دیا گیا ہے

ممبئی میں بھارتی بحریہ کو امدادی کارروائیوں کے لیے طلب کر لیا گیا اور اس کے جوانوں نے شہر کے ریلوے سٹیشنوں، سڑکوں، دفاتر اور ہوائی اڈے پر پھنسے ڈیڑھ لاکھ افراد کو محفوظ مقامات پر پہنچایا۔

تیز بارش کے سبب ممبئی ائرپورٹ پر آنے جانے والی تمام مقامی اور بین الاقوامی پروازیں دوسرے دن بھی منسوخ کر دی گئی ہیں۔ رن وے پر پانی کھڑا ہوگیا ہے اور ہوائی اڈے پر کام کرنے والا عملہ بھی کام پر نہیں پہنچا ہے۔

ریل کی پٹڑیاں پوری طرح پانی میں ڈوب جانے کے بعد ممبئی کی لوکل ٹرین سروس بھی بند ہے۔ بارش سے عام زندگی بری طرح متاثر ہوئی ہے۔ کئی علاقوں میں بجلی فراہم کرنے والی پرائیوٹ کمپنیوں نے بجلی کی سپلائی بند کر دی ہے اور شہر کی ٹیلیفون سروس بھی بارش سے متاثر ہوئی ہے۔