بارش سے دریاؤں میں پانی کی سطح خطرناک حد تک بلند ہوگئی ہے

سب سے زیادہ ہلاکتیں جنوبی ریاست کرناٹک میں ہوئی ہیں جہاں ترپّن افراد بارش کی نذر ہوئے ہیں جبکہ ریاست آندھراپردیش میں سینتیس، کیرالہ میں سترہ اور مہاراشٹر میں اکتیس افراد ہلاک ہوئے ہیں۔

ہندوستان میں جان لیوا بارشیں

بی بی سی کے نامہ نگار کے مطابق آندھرا پردیش میں حکومت کا کہنا ہے کہ شدید بارش کی وجہ سے کم از کم نو ہزار گھر تباہ ہوگئے ہیں۔

بارش کے سبب متاثرہ ریاستوں میں معمول کی زندگی مفلوج ہو کر رہ گئي ہے، بس اور ٹرین سروسز بری طرح متاثر ہوئی ہیں جبکہ بڑی تعداد میں متاثرین کو امدادی کیمپوں میں پہنچایا گیا ہے۔ کرناٹک کے بیجا پور، گلبرگ، بغل کوٹ، جنوبی کنٹر، دھارواڑ اور شیموگا کے اضلاع بارش سے سب سے زیادہ متاثر ہوئے ہیں۔

ریاست مہاراشٹر میں سنیچر سے جاری زبردست بارش کے سبب اکیس افراد مارے گئے ہیں۔ پونے میں دو مقامات پر دیواریں گرنے کی وجہ سے بارہ افراد حبکہ ممبئی میں ایک مکان کے منہدم ہونے سے پانچ افراد ہلاک ہوئے۔ناسک اور جلگاؤں میں چار، چار جبکہ نندوربار اور دولے میں تین، تین افراد ہلاک ہوئے ہیں۔ محکمہ موسمیات کے مطابق ممبئی میں مزید چوبیس گھنٹے بارش ہونے کا امکان ہے۔

ریاست آندھرا پردیش میں گزشتہ جمعہ سے جاری بارش اب رک گئی ہے اور حالات میں کچھ بہتری آئی ہے۔ تاہم ریاست میں معمول کی زندگی بری طرح متاثر ہوئی ہے جبکہ ماہی گيروں کو ہدایت دی گئی ہے کہ وہ مچھلی پکڑنے کے لیے سمندر میں نہ جائیں۔

ریاست کیرالہ میں بھی بارش رک گئی ہے اور حالات معمول پر آ رہے ہیں۔ بعض ریاستتوں میں بارش کی وجہ سے پیدا شدہ ہنگامی حالات سے نمٹنے اور امدادی کارروائیوں کے لیے فضایہ اور بحریہ کے جوانوں کو تیار رہنے کی ہدایات جاری کی گئی ہیں۔

حالات کی شدت کو دیکھتے ہوئے مرکزی حکومت نے بھی اس معاملے پر اپنی تشویش ظاہر کی ہے اور وزیر اعظم ڈاکٹر منموہن سنگھ کو موجودہ صورت حال کے بارے میں بریفنگ دی گئی ہے۔

تاہم بعض ریاستوں میں بارش کی وجہ سے پیدا شدہ ہنگامی حالات سے نمٹنے اور امدادی کارروائیوں کے لیے فضائیہ اور بحریہ کے جوانوں کو تیار رہنے کی ہدایات جاری کی گئی ہیں۔