اس برس انڈیا میں مون سون کے دوران 300 افراد ہلاک ہو چکے ہیں

حکام کا کہنا ہے کہ تیز بارش کی وجہ سے کئی گھر گر گئے ہیں جبکہ کئی افراد پانی کے تیز بہا‎ؤ میں بہہ گئے ہیں۔

حکام کا یہ بھی کہنا ہے کہ نوسر، بڑودہ، سورت، آنند، اور بروچ نامی اضلاع کے نشیبی علاقوں سے تقریباً بیس ہزار لوگوں کو محفوظ مقامات پر منتقل کر دیا گیا ہے۔ فی الوقت ریاست کے بیشتر دریاؤں کا پانی خطرے کے نشان سے اوپر بہہ رہا ہے۔

مسلسل بارش کی وجہ سے جنوبی گجرات اور پڑوسی ریاست مہاراشٹر کے شہر ممبئی کے درمیان ریل سروس بھی بری طرح متاثر ہوئی ہے۔ٹرین کی پٹڑیوں پر پانی بھر جانے کے سبب کئی گاڑیوں کی روانگی ملتوی کر دی گئی ہے۔بارش کی وجہ سے گجرات اور مہاراشٹر کو جوڑنے والی نیشنل ہائی وے پر بھی گاڑیوں کی آمدورفت پر اثر پڑا ہے۔

یاد رہے کہ گزشتہ برس بھاری بارش کی وجہ سے ریاست گجرات میں پچاس سے زیادہ افراد ہلاک اور تقریباً پیسٹھ ہزار لوگ بےگھر ہوگئے تھے۔

خبر رساں ایجنسی اے ایف پی کے مطابق اس برس مون سون کے دوران پورے ہندوستان میں ہلاک ہونے والوں کی تعداد تین سو سے زیادہ ہو چکی ہے۔ایجنسی کا یہ بھی کہنا ہے کہ ہر برس کی طرح اس مرتبہ بھی زیادہ تر اموات بجلی گرنے، زمین دھنسنے، گھروں کے گرنے اور لوگوں کے پانی میں بہہ جانے کے سبب ہوئی ہیں۔

دوسری جانب ریاست مہاراشٹر میں حکام نے بارش سے سب سے زيادہ متاثر چار ضلعوں سے تقریباً پانچ ہزار لوگوں کو محفوظ مقامات پر منتقل کر دیا ہے۔ ریاست کے امداد اور آبادکاری کے سیکرٹری کرشنا ویاس نے بی بی سی کو بتایا کہ ستارا، سنگلی، کولہاپور اور شعلہ پور میں نشیبی علاقوں سے اڑتالیس سو خاندانوں کو دیگر محفوظ مقامات پر پہنچا دیا گیا ہے۔

بارش کے سبب ستارا اور سنگلی اضلاع میں دو عورتیں بھی ہلاک ہوئی ہیں جبکہ حکام کا کہنا ہے کہ متاثرہ علاقوں میں فوج سمیت کئی حفاظتی ایجنسیوں کو تعینات کر دیا گيا ہے۔