ایم ایس احمد بی بی سی اردو ڈاٹ کام، پٹنہ

	ملک کے مختلف حصوں میں مسلسل بارش بہت سے مسائل کو جنم دے رہی ہے

بارش کی وجہ سے بہار شریف میں اتوار کو ایک گھر کی دیوار گرنے سے چھ افراد کی موت واقع ہوگئی۔ اس کے علاوہ ریاست کے مختلف مقامات سے دیواروں اور گھروں کے گرنے سے متعدد افراد کے مرنے کی اطلاع ہے۔

ریاست بہار کے مشرقی شہر بھاگلپور میں بارش سے پریشان مقامی انتظامیہ نے ہیلی کاپٹر کی مدد طلب کی ہے کیونکہ پٹنہ، گیا، مظفر پور اور سیتامڑھی کے درمیان سڑکوں پر پانی کی وجہ سے ٹریفک کی آمد و رفت بند ہے۔

ترہت کمشنری کے کمشنر سی للسوتا نے تمام اضلاع کے مجسٹریٹس کو سیلاب کے خطرے کے پیش نظر تیار رہنے کی ہدایت کی ہے۔ مظفرپور کے ضلع مجسٹریٹ ونے کمار نے تمام افسران کی چھٹیاں معطل کرنے کا اعلان کیا ہے۔

بارش کی وجہ سے جنوبی بہار کی اکثر ندیوں میں پانی خطرے کے نشان سے اوپر چلا گیا ہے۔ تیز ہوا اور بارش کی وجہ سے گنے سمیت کئی فصلوں کو کافی نقصان پہنچا ہے۔

مسلس بارش نے ٹیلی فون اور بجلی کا نظام بھی درہم برہم کر دیا ہے جس سے درگا پوجا کے شامیانے اور مورتیاں بنانے والے کاریگروں کو کافی دقت کا سامنا ہے۔ اکثر جگہوں پر یہ دونوں کام بند ہیں۔ پوجا کے کاروبار سے وابستہ تاجروں کے لیئے یہ صورت حال کافی مایوس کن ہے۔

ماہر موسمیات اودھ بہاری سنگھ نےخلیج بنگال میں آئے طوفان کو اس مسلسل بارش کی وجہ بتایا ہے۔ بہاری سنگھ کے مطابق ایک دو دن میں بارش سے نجات ملنے کی امید ہے۔