تصاویر میں برٹنی کو ان کے گھر سے سٹریچر پر لے جاتے دکھایا گیا ہے

یہ عدالتی احکامات اس واقعے کے ایک دن بعد سامنے آئے ہیں جب ایک دن قبل عدالت کی زیر نگرانی ہونے والی ایک ملاقات کے بعد برٹنی کے بچوں کو واپس کرنے سے انکار پر پولیس کو مداخلت کرنی پڑی تھی۔

عدالت پہلے ہی جوڑے کے دوسالہ بیٹے سین پریسٹن اور ایک سالہ جیڈن جیمز کی عارضی تحویل برٹنی کے سابق شوہر کے حوالے کر چکی ہے۔

عدالت کے فیصلہ سناتے وقت کیون فیڈرلین عدالت میں موجود نہیں تھے۔ بچوں کی تحویل سے متعلق ایک اور سماعت چودہ جنوری کو ہوگی۔ عدالتی فیصلے کے بعد کیون فیڈرلین کے وکیل کا کہنا تھا کہ انہیں کسی بھی واقعے پر خوشی نہیں ہوئی ہے۔

پولیس افسر جیسن لی نے بی بی سی کو بتایا کہ بچوں کی تحویل سے متعلق ہونے والے ایک جھگڑے کے دوران جمعرات کو مقامی وقت کے مطابق آٹھ بجے پولیس برٹنی سپیئرز کے گھر بلوائی گئی، جس کو برٹنی اور ان کے سابق شوہر نے عدالتی احکامات تحت پرامن طریقے سے سلجھانے کی کوشش کی۔ اطلاعات کے مطابق تقریباً تین گھنٹے بعد برٹنی نے بچے حوالے کردیے۔

اطلاعات ہیں کہ پولیس جب برٹنی کے گھر داخل ہوئی تو وہ کسی نامعلوم نشے کے زیر اثر تھیں۔ بعد ازاں انہیں طبی جانچ کے لیے ہسپتال لے جایا گیا۔

بی بی سی کے نامہ نگار ڈیوڈ ولیمز کے مطابق مقامی ٹی وی پر خبروں میں دکھایاگیا ہے کہ پولیس اہلکار برٹنی سپیئرز کے ہل ٹاپ میشن میں موجود ہیں اور تصاویر میں بظاہر انہیں گھر سے کسی سٹرریچر پر لے جاتے دکھایا گیا ہے۔

	برٹنی سپئرز اور کیون فیڈرلین نے ستمبر 2004 میں شادی کی تھی

ایک امریکی رسالے میں چھپنے والی خبروں کے مطابق لاس اینجلس کے ایک مقامی ہسپتال میں ان کی بہترگھنٹوں پر محیط طبی تشخیص جاری ہے۔

اس ہفتے کے آغاز پر برٹنی کے وکلاء نے یہ کہتے ہوئے عدالت میں برٹنی کے مقدمے کی پیروی سے معذوری کی درخواست داخل کی تھی کہ اب ان کے اور ان کی مؤکلہ درمیان کوئی رابطہ نہیں ہے۔

واضح رہے کہ برٹنی سپئرز اور کیون فیڈرلین نے ستمبر 2004 میں شادی کی تھی تاہم ان کے درمیان گزشتہ سال جولائی میں طلاق ہو گئی تھی۔ یہ برٹنی کی دوسری شادی تھی۔ اس سے قبل انہوں نے بچپن کے دوست جیسن الیگزنڈر سے بیاہ رچایا تھا جو صرف پچپن گھنٹے بعد طلاق پر ختم ہوا۔