امریکی گلوکارہ برٹنی سپیئرز بال اتروانے کے بعد

برٹنی سپیئرز نےگزشتہ جمعہ کو کیلیفورنیا کے ایستھر ہیئر سٹوڈیو میں اپنے سر کے تمام بال اتروا دیے تھے اور buybritneyshair.com نامی یہ ویب سائٹ مبینہ طور پر اس سیلون کی مالکہ ایستھر ٹوگونوزی نے بنائی ہے۔

اس ویب سائٹ پر کٹوائے گئے بالوں کی تصاویر بھی موجود ہیں اور کہا گیا ہے کہ یہ بال’مکمل طور پر تصدیق شدہ ہیں‘۔ ویب سائٹ پر خریداری کے اس موقع کو’زندگی میں ایک بار ملنے والا موقع‘ قرار دیتے ہوئے کامیاب بولی دہندہ کو وہ قینچی بھی دینے کا اعلان کیا گیا ہے جس سے برٹنی کی حجامت کی گئی تھی۔

سیلون کی مشترکہ مالکہ جے ٹی ٹوگونوزی کا کہنا ہے’ہم نہیں جانتے اور شاید کبھی جان بھی نہ پائیں کہ برٹنی نے آخر ہمارے سیلون کو ہی کیوں چُنا‘۔ انہوں نے بتایا کہ پہلے انہوں نے ان بالوں کو ’ای بے‘ پر فروخت کے لیے پیش کیا تھا تاہم نامعلوم وجوہات کی بنا پر آن لائن خریدوفروخت کی اس ویب سائٹ نے اس بولی کو منسوخ کر دیا۔

گزشتہ برس کیون فیڈرلائن سے علیحدگی کے بعد سے امریکی گلوکارہ برٹنی سپیئرز اپنے رویے کی وجہ سے اکثر شہ سرخیوں میں رہی ہیں۔