وِل سمتھ ایک ٹی وی چینل کے لانچ کے لیے انڈیا کے دورے پر آئے ہیں

’میں سمجھتا ہوں کہ حقیقت میں ہالی وڈ اور بالی وڈ کے درمیان اشتراک کی ضرورت ہے۔‘ وِل سمتھ نے امید ظاہر کی کہ وہ انڈین سنیما کے اداکاروں اور ہدایت کاروں کے ساتھ مل کر کام کریں گے۔

انہوں نے بالی وڈ کے اداکاروں، ہدایت کاروں اور پروڈیوسروں سے ملاقاتیں کی ہیں اور سٹوڈیوز دیکھنے بھی گئے۔ ’میں ان سے ملاقاتیں کررہا ہوں تاکہ تخلیقی رابطے قائم ہوں اور نئی چیزیں وجود میں آئیں۔‘

ہالی وڈ کے ایکٹر کا کہنا تھا کہ وہ فلم ’سرکار‘ میں امیتابھ بچن کی اداکاری سے بےحد متاثر ہوئے۔ امیتابھ بچن کو بالی وڈ کے عرف عام میں بِگ بی بھی کہا جاتا ہے۔ وِل سمتھ کا کہنا تھا کہ ’میں ان کی اداکاری سے اتنا مثاتر ہوا ہوں کہ میں نے آج سے فیصلہ کیا ہے کہ میں بِگ ڈبلیو کے نام سے جانا جانا چاہوں گا۔‘

ایکٹریس ایشوریہ رائے کی انہوں نے خصوصی طور پر تعریف کی۔ میں چاہتا تھا کہ ان کے ساتھ فلم ’ہِچ‘ میں کام کروں لیکن وہ اس وقت ’برائیڈ اینڈ پریجوڈِس‘ کی شوٹنگ کررہی تھیں۔‘

’ان کے اندر ایسی توانائی ہے کہ انہیں کچھ کہنے کی ضرورت نہیں، کچھ کرنے کی ضرورت نہیں، وہ صرف (ایک مجسمے کی طرح) کھڑی ہوجائیں۔۔۔‘

وِل سمتھ کا یہ بھی کہنا تھا کہ جب انہیں معلوم ہوا کہ بالی وڈ میں ہر سال آٹھ سو سے زائد فلمیں بنتی ہیں تو ان کی آنکھوں کو یقین نہ آیا۔ آج کل وہ ’سونی‘ ٹیلی ویژن کی دعوت پر انڈیا آئے ہوئے ہیں۔ سونی گروپ انڈیا میں انگریزی زبان کا ’پِکس‘ نامی ٹی وی چینل شروع کررہا ہے۔

ہالی وُڈ کے اداکار نے دلی کا دورہ بھی کیا اور تاج محل دیکھنے آگرہ گئے۔ ان کا کہنا تھا کہ انہوں نے مغل بادشاہ شاہ جہاں سے ’قربت‘ محسوس کی جنہوں نے تاج محل اپنی اہلیہ ممتاز کی محبت میں بنوایا تھا۔

’لاس اینجلس میں اپنے گھر میں میں نے ایک جھیل بنوائی اور اسے اپنی اہلیہ کی محبت میں ’اس کی جھیل‘ (یعنی انگریزی میں ’ہر لیک‘) کا نام دیا۔‘ وِل سمتھ نے مزید کہا: ’جب میں تاج محل میں گزر رہا تھا، میں کہتا رہا، میں وہ شخص ہوں۔‘