عزیزاللہ خان بی بی سی اردو ڈاٹ کام، کوئٹہ

	رہنماؤں کو ایم پی او کے تحت گرفتار کیا گیا ہے

نوشکی میں پولیس نے بلوچستان نیشنل پارٹی مینگل گروپ، جماعت اسلامی اور نیشنل پارٹی کے تین مقامی رہنماؤں کو ایم پی او کے تحت گرفتار کر لیا ہے۔

پولیس اہلکاروں نے بتایا ہے کہ انہیں امن و امان کے صورتحال کی وجہ سے حراست میں لیا گیا ہے۔ یاد رہے یہ تینوں جماعتیں انتخابات کا بائیکاٹ کر رہی ہیں۔

ادھر ژوب میں جمعیت علماء اسلام فضل الرحمان گروپ کے نظریاتی دھڑے نے ایک ریلی نکالی ہے۔ جمعیت علماء اسلام فضل الرحمان گروپ کے نظریاتی دھڑے کے قائدین نے ظریف شہید پارک میں جلسہ عام سے خطاب بھی کیا۔

مقامی لوگوں کے مطابق اس جلسے میں بڑی تعداد میں لوگوں نے شرکت کی ہے۔ تقاریر کے دوران قائدین نے اس تاثر کو غلط قرار دیا ہے کہ نظریاتی دھڑے کے قائدین بلوچستان میں وزیرستان جیسے حالات پیدا کرنا چاہتے ہیں۔

	نظریاتی دھڑے کےاٹھارہ امیدوار انتخابات میں حصہ لے رہے ہیں

یاد رہے جمعیت علماء اسلام کے سربراہ مولانا فضل الرحمان نے اس دھڑے کے قائدین سے کہا ہے کہ وہ اپنے امیدواروں کے خلاف انتخابات میں حصہ نہ لیں وگرنہ انہیں جماعت سے نکال دیا جائے گا۔

ان مقامی قائدین کا موقف ہے کہ ان کا اختلاف صوبائی قیادت سے ہے اور ان کے دھڑے کو بڑی تعداد میں لوگوں کی حمایت حاصل ہے۔ اس دھڑے کے تقریباً اٹھارہ امیدوار تختی کے نشان سے انتخابات میں حصہ لے رہے ہیں۔