కరోనావైరస్: వర్క్ ఫ్రమ్ హోమ్ బాటలో కంపెనీలు.. ఇంటి నుంచి ఒంటరిగా పనిచేయటం ఎలా?

గూగుల్, మైక్రోసాఫ్ట్, ట్విటర్. హిటాచి, యాపిల్, అమెజాన్. చెవ్రాన్, సేల్స్‌ఫోర్స్, స్పాటిఫై. బ్రిటన్ నుంచి అమెరికా వరకూ, జపాన్ నుంచి దక్షిణ కొరియా వరకూ.. ఈ ప్రపంచ దిగ్గజ సంస్థలు తమ సిబ్బంది తప్పనిసరిగా ఇంటి నుంచే పని చేసే విధానాన్ని అమలులోకి తెచ్చాయి. దీనికి కారణం.. కోవిడ్-19 విస్తరిస్తుండటమే.

కరోనావైరస్ 'మహమ్మారి' స్థాయిని చేరుకుందని ప్రపంచ ఆరోగ్య సంస్థ బుధవారం ప్రకటించటంతో.. ఇప్పుడిక చాలా మంది ఉద్యోగులు కొంత కాలం పాటు 'ఇంటి ఆఫీసు'కు మారటం మామూలు విషయంగా మారుతోందనటంలో సందేహం లేదు.

కొంతమందికి ఇంటి నుంచి పనిచేయటం కొత్త కావచ్చు. అలాంటపుడు కొత్త వాతావరణంలో పని మీద దృష్టి కేంద్రీకరించటం, విడివిడిగా ఉన్న టీమ్‌ సభ్యులతో సమన్వయం చేసుకోవటం, విధులు కొనసాగించటం కష్టం కావచ్చు. అది ఉత్పాదకత మీద ప్రభావం చూపొచ్చు.

అయితే.. ఇంట్లో మంచి పని స్థలాన్ని ఏర్పాటు చేసుకోవటానికి, టీమ్ సభ్యులతో సంప్రదింపులు జరపటానికి, ఫలితాలు అందించటానికి కొన్ని మార్గాలున్నాయి.

నిరంతరం మాట్లాడుకోండి...

కారణం కరోనావైరస్ కానీ, కాకపోనీ.. ఇంటి నుంచి పనిచేసేటపుడు కీలకమైన విషయం మీ బాస్‌తో సమాచర సంబంధాలు స్పష్టంగా ఉండటం.. మీరు చేయాల్సిన పని ఏమిటో విస్పష్టంగా తెలుసుకుని ఉండటం.

''ఏ రోజుకారోజు ఏ పనులు పూర్తిచేయాలో విస్పష్టంగా తెలుసుకోండి. ప్రతి రోజూ పని మొదలు పెట్టటానికి ముందు, ముగిసిన తర్వాత ఆ పనికి సంబంధించి మీ మేనేజర్‌తో కొన్ని నిమిషాలు మాట్లాడే వీలుంటుందేమో చూడండి'' అని.. రిమోట్ వర్కింగ్ (దూరం నుంచి పనిచేయటం) మీద అధ్యయనం చేస్తున్న బోస్టన్‌లోని నార్త్‌ఈస్ట్రన్ యూనివర్సిటీ ప్రొఫెసర్ బార్బరా లార్సన్ సూచిస్తున్నారు.

సాధారణంగా చాలా మంది తమ బాస్‌లకు దగ్గరగా ఉండి పనిచేస్తుంటారు. అంటే సమాచార మార్పిడికి సమస్యలు, ఇబ్బందులు ఉండవు. కానీ దూరం నుంచి పనిచేసేటపుడు ఇలా ఉండదు. ఒకవేళ మీరు పనిచేసే స్థలంలో రిమోట్ వర్కింగ్‌కు అవసరమైన ఏర్పాట్లు లేకపోయినట్లయితే.. పనికి సంబంధించిన సమాచార వ్యవస్థ కుప్పకూలే అవకాశం ఎక్కువగా ఉంటుంది. దూరంగా ఉండి పర్యవేక్షించటం మీ మేనేజరుకు అలవాటు లేకపోవచ్చు. మీ సంస్థ దగ్గర రిమోట్ వర్కర్లకు అవసరమైన స్లాక్, జూమ్ వంటి యాప్‌లు, పనిముట్లు లేకపోవచ్చు.

ఇంటి నుంచి పనిచేసేటపుడు ఒంటరితనం అతి పెద్ద సవాలు అని.. గత ఏడాది బఫర్ అనే ఆన్‌లైన్ బ్రాండ్ డెవలప్‌మెంట్ ఏజెన్సీ 2,500 మంది రిమోట్ వర్కర్ల మీద నిర్వహించిన ఒక అధ్యయనంలో 19 శాతం మంది చెప్పారు. ఒంటరితనం వల్ల ఉత్సాహం, ఉత్పాదకత తక్కువగా ఉండొచ్చు.

కాబట్టి స్కైప్, జూమ్ వంటి యాప్‌లతో వీడియో కాల్స్ ద్వారా బాస్‌తోను, సహచరులతోనూ మాట్లాడుతూ పనిచేయటం ఉత్సాహాన్నిస్తుందని లార్సన్ చెప్తారు.

నిజమైన ఉద్యోగంలా చేయండి...

మన ఇంట్లో మనం పైజమాలతో తిరగవచ్చు కాబట్టి ఇంటి నుంచి పని చేసేటప్పుడు కూడా అలాగే ఉండటం సరికాదు. ''ఇంటి నుంచి పనిచేసినా కూడా ఆఫీసుకు వెళ్లేటప్పుడు రెడీ అయినట్లుగానే స్నానం చేసి, ఆఫీస్ దుస్తులు వేసుకుని రెడీ అవ్వండి. నిజమైన ఉద్యోగంలా పరిగణించండి'' అని లార్సన్ సూచిస్తున్నారు.

ఇంట్లో ఆఫీసు లేకపోతే.. తాత్కాలికంగా, ప్రత్యేకంగా ఆఫీసును తయారు చేసుకోవాలి. ఇంట్లో సరైన ఆఫీసు స్థలం లేకపోతే ఉత్పాదకత తాత్కాలికంగా తగ్గిపోవచ్చునని ఫ్లెక్స్‌జాబ్స్ సీఈఓ సారా సటన్ వివరిస్తున్నారు. ఇంట్లో రెండు మానిటర్లు, వైర్‌లెస్ కీబోర్డు, మౌస్ వంటివి.. తాను ఎక్కువ ఉత్పాదకంగా పనిచేయటానికి తోడ్పబతాయని ఆమె చెప్పారు.

కాబట్టి ల్యాప్‌టాప్ పట్టుకుని మంచం మీద పడుకోవటం కాకుండా.. ఆఫీస్‌లో లాగానే ఒక టేబుల్, కుర్చీ వంటి వాటిని ఏర్పాటు చేసుకుని నిటారుగా కూర్చుని పని మొదలుపెట్టాలి. ''ఎటువంటి అవాంతరాలూ రాకుండా ఏర్పాట్లు చేసుకోవాలి. మీరు పని చేస్తున్నారన్న విషయాన్ని ఇంట్లో వారికి అర్థమయ్యేలా చెప్పాలి: 'తలుపు మూసి ఉందంటే నేను ఇంట్లో లేననట్లు భావించండి' అని చెప్పటం వంటివి చేయాలి'' అని యూనివర్సిటీ ఆఫ్ జార్జియాలో సైకాలజీ ప్రొఫెసర్ క్రిస్టెన్ షాక్లీ పేర్కొన్నారు.

ఇంట్లో పని మీద దృష్టి కేంద్రీకరించేలా ప్రత్యేక స్థలం ఉంటే.. ఇంటి నుంచి పనిచేయటం వల్ల అనేక ప్రయోజనాలు ఉంటాయి. ఫ్లెక్సీజాబ్స్ గత ఏడాది 7,000 మంది వర్కర్ల మీద నిర్వహించిన సర్వేలో.. ఇంటి నుంచి పనిచేస్తున్నపుడు తాము మరింత ఎక్కువ ఉత్పాదకంగా పనిచేశామని 65 శాతం మంది చెప్పారు. సహోద్యోగుల నుంచి అవాంతరాలు తగ్గిపోవటం, ఆఫీస్ రాజకీయాలు లేకపోవటం, ప్రయాణం చేయాల్సిన ఒత్తిడి తగ్గిపోవటం వంటివి దీనికి కారణంగా చూపారు.

అయితే.. పని ముగిసిన తర్వాత ఆ మూడ్ నుంచి బయటకు రావటం కూడా ముఖ్యమే. బఫర్ సర్వేలో వర్క్ ఫ్రమ్ హోమ్‌కు సంబంధించి చాలా ఎక్కువగా వినిపించిన ఫిర్యాదు ఇదే. పని దినానికి నిర్దిష్ట అవధులు ఉండే.. ఒక భౌతిక కార్యాలయంలోకి ప్రవేశించటం, బయటపడటం, ప్రయాణం చేయటం వంటివి లేనపుడు.. ఇంట్లో పని స్థలాన్ని మానసికంగా అనుభూతి చెందటం కోసం ఉదయం పనిలో 20 నిమిషాల పాటు కాఫీ బ్రేక్ తీసుకోవటం, సాయంత్రం పని పూర్తయిన తర్వాత కొంతసేపు వ్యాయామం చేయటం మంచి మార్గాలని షాక్లీ సూచిస్తున్నారు.

ఇంటి నుంచి పని చేసేటపుడు మధ్యలో పిల్లలను చూసుకోవటం, ఇంటి పనులు చేసుకోవటం వంటి ఆలోచనలను దూరంగా ఉంచాలని.. ఆఫీసులో పనిచేస్తున్న భావనలోకి పూర్తిగా వెళ్లాలని ఆమె చెప్తారు.

ఏకాకిగా ఉన్న భావనలు రానివ్వొద్దు...

ఇవన్నీ చేసినా కూడా.. ఆఫీసు పనిని ఇంటి నుంచే చేయాల్సిన తప్పనిసరి పరిస్థితి అకస్మాత్తుగా తలెత్తటం వల్ల.. ఈ మార్పుకు అలవాటు పడటానికి కాస్త ఇబ్బంది పడాల్సి వస్తుంది.

''కరోనావైరస్ ప్రతి ఒక్కరినీ ఈ తరహా విపరీత పరిస్థితుల్లోకి నెడుతోంది'' అని కాలిఫోర్నియాలోని స్టాన్‌ఫర్డ్ యూనివర్సిటీలో ఎకనామిక్స్ ప్రొఫెసర్ నికొలస్ బ్లూమ్ పేర్కొన్నారు. ఇంటి నుంచి పనిచేయటంలో రెండు రకాలు ఉంటాయని ఆయన చెప్పారు. అవి: ఒకటి - స్వల్ప కాలికంగా లేదా అప్పుడప్పుడు ఇంటి నుంచి పనిచేయటం. రెండోది - శాశ్వతంగా లేదా పూర్తి కాలం ఇంటి నుంచి పనిచేయటం. ''ఇది చిన్నపాటి వ్యాయామాన్ని - మారథాన్ శిక్షణతో పోల్చటంలా ఉంటుంది'' అని ఆయన వ్యాఖ్యానించారు.

శాశ్వతంగా లేదా పూర్తి కాలం ఇంటి నుంచి పనిచేయటం ఇంకా చాలా అరుదేనని బ్లూమ్ చెప్తారు. ఉదాహరణకు అమెరికా శ్రామికశక్తిలో కేవలం 5 శాతం మంది మాత్రమే తాము పూర్తి కాలం రిమోట్ వర్కర్స్‌గా పనిచేస్తున్నట్లు చెప్తున్నారు.

కరోనావైరస్ ప్రభావం కారణంగా జనం ఎంత కాలం పాటు ఇళ్ల నుంచి పనిచేస్తారనే అంశం మీద ఇంకా స్పష్టత లేదు. దీనివల్ల అదనపు సమస్యలు ఉంటాయి. ఉదాహరణకు.. స్కూళ్లు మూసివేయటంతో పిల్లలు ఇళ్లలోనే ఉండటం వల్ల.. వారి తల్లిదండ్రులు ఇంటి నుంచి పనిచేయటం కష్టంగా మారుతుంది.

దీర్ఘ కాలం ఒంటరిగా ఉండటం.. నైతిక స్థైర్యం, ఉత్పాదకత మీద కూడా ప్రభావం చూపే అవకాశముంది. అందుకే ఆఫీస్‌లో కలిసి పనిచేసే బృందాలు ఇళ్ల నుంచి పనిచేస్తున్నా కూడా నిరంతరం సంప్రదింపులు జరుపుకుంటూ.. వీడియో సమావేశాలతో పార్టీలు చేసుకోవటం వంటివి చేస్తూ సాధ్యమైనంత వరకూ సాధారణ పరిస్థితులను నెలకొల్పటానికి ప్రయత్నించాలని లార్సన్ చెప్తున్నారు.

''ఇది కొంచెం చిత్రంగా అనిపించొచ్చు. కానీ అందరికీ చిత్రంగానే ఉంది. ఇది సరదాగానూ ఉంటుంది'' అంటారు.

ఆఫీసులో ఉండే సామాజిక కార్యకలాపాలాను ఆన్‌లైన్‌లోకి మార్చుకునే ఆలోచనను సటన్ కూడా సమర్థిస్తున్నారు. ''బర్త్‌డే పార్టీలు చేసుకోండి.. లక్ష్యాలు సాధించినపుడు, ప్రాజెక్టులు పూర్తి చేసినపుడు పరస్పరం అభినందనలు చెప్పకోండి. మామూలు ముచ్చట్ల కోసం సమయం కేటాయించండి'' అని పేర్కొన్నారు.

ఉల్లాసంగా ఉండండి...

ఇది తీవ్రంగా ఒత్తిడికి గురిచేసే కాలం. పొరపాటు చేయొద్దు. భయం పుట్టించే వార్తలు, అనారోగ్యంతో ఉన్న పెద్దవాళ్లు, ప్రియమైన వాళ్ల గురించి ఆందోళన, అందరితో పాటు సానిటైజర్లు, టిష్యూ పేపర్లు కొని దాచుకోవాలనే తాపత్రయం వల్ల.. పనికి సంబంధించిన ఈమెయిల్స్‌ను పట్టించుకోకుండా పోయే ప్రమాదం ఉంది. ఒంటరితనం భావన కుంగుబాటుకు దారితీసే అవకాశం ఉంటుంది. మీ సహోద్యోగులతో ఎంత ఎక్కువగా సమాచార సంబంధాలు కొనసాగిస్తే.. ఆ పరిస్థితి అంత తక్కువగా ఉంటుంది.

''మొత్తంగా.. రెండు వారాలో, నాలుగు వారాలో స్వల్ప కాలం ఇంటి నుంచి పూర్తి కాలం పనిచేయటం ఆర్థికంగా, వ్యక్తిగతంగా బాధాకరంగా ఉంటుంది.. కానీ భరించదగ్గదేనని నేను భావిస్తున్నా'' అని బ్లూమ్ పేర్కొన్నారు. ఇంకా ఎక్కువగా.. అంటే రెండు, మూడు నెలల పాటు ఇంటి నుంచి పనిచేయటమనేది తీవ్రమైన ఆర్థిక, ఆరోగ్య నష్టాలకు దారితీయవచ్చు'' అని చెప్పారు.

ఇంటి నుంచి పనిచేయటంలో ఉండే లోటుపాట్లకు పరిష్కారాలు.. సాధ్యమైనంత ఎక్కువగా వీడియోకాల్స్ ద్వారా ఆన్‌లైన్‌లో ముఖాముఖి సంబంధాలు కొనసాగించటంలో ఉంటాయని ఆయన అంగీకరిస్తారు. ప్రత్యేకించి ఒంటరిగా నివసించే ఉద్యోగులకు మరింతగా ఏకాకులమయ్యామనే భావన ఉంటుందని.. వారిని తరచుగా పలకరిస్తూ ఉండాలని చెప్తారు. ఎటువంటి చర్చనీయాంశాలూ లేకుండాకూడా తరచుగా ఆన్‌లైన్ సమావేశాలు నిర్వహించుకోవాలని సూచిస్తున్నారు.

ఒకవేళ మీరు గనుక మేనేజర్ అయినట్లయితే.. స్పష్టమైన సమాచారం అందించే బాధ్యత మీ మీద ఉంటుంది. మీ టీమ్‌లో స్ఫూర్తిని బలంగా నిలిపివుంచటం కూడా కీలకం. ''ఈ రోజుల్లో ఒత్తిడికి లోనవటం, కుంగిపోవటం చాలా సులభం. మీరు మేనేజర్ అయినట్లయితే ఒత్తిడి ఉంటుందని, కష్టంగా ఉంటుందని గుర్తించండి.

మీ టీమ్‌ను ఉత్తేజపరిచే చీర్‌లాడర్‌గా వ్యవహరించటం మీ విధి'' అని లార్సన్ పేర్కొన్నారు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)