కరోనావైరస్ గురించి ఈ సినిమా 10 ఏళ్ల కిందే చెప్పిందా?

2011లో విడుదలైన హాలీవుడ్ సినిమా కంటేజియన్ బాక్సాఫీసు వద్ద పెద్దగా వసూళ్లు రాబట్టలేదు.

మాట్ డామన్, జూడ్ లా, గ్వినేత్ పాల్ట్రో, కేట్ విన్‌స్లెట్, మైఖేల్ డగ్లస్‌ లాంటి తారాగణం ఉన్నప్పటికీ, ఈ చిత్రం ఆ ఏడాది ప్రపంచవ్యాప్తంగా అత్యధిక వసూళ్లు రాబట్టిన సినిమాల జాబితాలో 61వ స్థానంతోనే సరిపెట్టుకుంది.

కానీ, ఇప్పుడు ఉన్నట్టుండి అమెరికాలోని యాపిల్ ఐట్యూన్స్ స్టోర్‌లో అత్యధికంగా డౌన్‌లోడ్ అయిన సినిమాల జాబితాలోకి కంటేజియన్ వచ్చి చేరింది. ఈ చిత్రం పేరుతో గూగుల్‌లో శోధనలు భారీగా పెరుగుతున్నాయి.

చైనాలో కరోనావైరస్ (కోవిడ్ -19) వ్యాప్తికి సంబంధించి డిసెంబరులో మొదట వార్తలు వచ్చాయి. అప్పటికి అత్యధిక ప్రేక్షకాదరణ పొందిన సినిమాల జాబితాలో ఈ సినిమా 270వ స్థానంలో ఉండేది. కానీ, అదే సినిమా ఇప్పుడు హ్యారీ పోటర్ సిరీస్‌లోని 8 సినిమాల తర్వాతి స్థానంలోకి వచ్చేసింది.

దశాబ్దం కింద విడుదలైన ఈ సినిమా కథాంశానికి, ప్రస్తుత వైరస్ వ్యాప్తికి మధ్య సారూప్యతలు ఉండటమే అందుకు కారణం.

అప్పుడు... ఇప్పుడు

ఈ సినిమాలో, ఒక వ్యాపారవేత్త (పాల్ట్రో పోషించిన పాత్ర) అకస్మాత్తుగా విజృంభించిన ఓ ప్రమాదకర వైరస్ భారిన పడి చనిపోతారు. చైనా పర్యటనలో ఉన్నప్పుడు ఆమెకు ఆ వైరస్ సోకుతుంది. తర్వాత ఆ వైరస్ ప్రపంచవ్యాప్తంగా ఆరోగ్య అత్యవసర పరిస్థితికి దారితీస్తుంది.

ప్రస్తుత కరోనావైరస్ వ్యాప్తి కూడా చైనాలోనే మొదలైంది. కాబట్టి, ఈ సినిమా కథతో దానిని పోల్చి చూస్తున్నారు. దాంతో, గత కొన్నివారాలుగా ఈ సినిమాను వీక్షించేవారి సంఖ్య భారీగా పెరిగింది.

ఫిబ్రవరి 26న విమానంలో ప్రయాణిస్తూ ఫేస్‌మాస్క్ ధరించిన చిత్రాన్ని నటి పాల్ట్రో ఇన్‌స్టాగ్రామ్‌లో పోస్ట్ చేశారు. ఈ సినిమాపై జనాలకు ఆసక్తి పెరగడానికి ఆ పోస్టు కూడా కొంతమేర ఉపయోగపడింది.

"నేను ఇప్పటికే ఈ సినిమాలో ఉన్నాను. అందరూ సురక్షితంగా ఉండండి. కరచాలనాలకు దూరంగా ఉండండి. తరచూ చేతులు కడుక్కోండి" అంటూ 60 లక్షల మంది ఫాలోయర్లున్న తన ఇన్‌స్టాగ్రామ్ ఖాతాలో ఆమె రాశారు.

సారూప్యతలు

వాస్తవికతకు దగ్గరగా అనిపించే విషయాలు కంటేజియన్ సినిమాలో చాలానే ఉన్నాయి.

సినిమాలో పాల్ట్రో పాత్రకు సోకిన వైరస్ పేరు ఎంఈవీ-1. గబ్బిలం ద్వారా వ్యాప్తి చెందే ఆ వైరస్ ఓ పందికి సోకుతుంది. ఆ పంది మాంసాన్ని తాకిన ఓ హాంగ్‌కాంగ్ చెఫ్‌... పాల్ట్రోకు షేక్‌హ్యాండ్ ఇస్తారు. అలా ఆ వైరస్ పాల్ట్రోకు సంక్రమిస్తుంది.

ఆ తర్వాత ఆమె తిరిగి ఇంటికి వెళ్లిపోయాక తీవ్ర అనారోగ్యానికి గురై, కొద్ది రోజులకే చనిపోతారు. అనంతరం కొన్నాళ్లకే ఆమె కుమారుడు కూడా చనిపోతారు. ఆమెకు భర్తగా నటించిన మాట్ డామన్‌లో రోగనిరోధక శక్తి మెరుగ్గా ఉండటంతో ఆయన ప్రాణాలతో బయటపడతారు.

నిజ జీవితంలో, చైనా నగరమైన వూహాన్‌లో కోవిడ్ -19 మొదట వైరస్ జంతువుల నుంచి మనుషులకు సంక్రమించి ఉంటుందని నిపుణులు భావిస్తున్నారు. 2002-03 నాటి సార్స్ మహమ్మారి మాదిరిగానే ఈ కరోనావైరస్ కూడా గబ్బిలాలలో పుట్టి, తరువాత మరో జాతి జీవి ద్వారా అది మనుషులకు సంక్రమించి ఉంటుందని అంటున్నారు.

ప్రస్తుత కరోనావైరస్‌కు వాహకంగా మారిన జీవి ఏదన్న విషయంలో ఇంకా స్పష్టత లేదు (కంటేజియన్ సినిమాలో పందిని వాహక జీవిగా చూపించారు). అయితే, వూహాన్ నగరంలోని జంతువుల మార్కెట్ నుంచి ఆ వైరస్ వ్యాప్తి చెందిందని చైనా అధికారులు గుర్తించారు.

ప్రస్తుత కరోనావైరస్ మాదిరిగానే, ఆ సినిమాలో చూపించిన కల్పిత వైరస్ కూడా బాధితులతో సన్నిహితంగా ఉండటం, కరచాలనం చేయడం ద్వారా వ్యాప్తి చెందుతుంది.

నిజ జీవిత ప్రేరణ

ఆ కల్పిత వైరస్‌ సోకినవారికి శ్వాసకోశ సమస్యలు ఎదురవుతాయని సినిమాలో చూపించారు. ప్రస్తుతం నిజ జీవితంలో కరోనావైరస్‌తోనూ అలాంటి సమస్యలే వస్తున్నాయి. అయితే, సినిమాలో ఎంఈవీ-1ను నిపా వైరస్ కుటుంబానికి చెందినదని చెప్పారు. అది కోవిడ్ -19 వైరస్ కుటుంబానికి చెందింది కాదు.

ఆ కల్పిత వైరస్ వ్యాప్తితో భారీగా ప్రాణ నష్టంతో జరుగుతుందని సినిమాలో చూపించారు. ప్రస్తుత కరోనావైరస్ వల్ల ప్రాణనష్టం అంతగా లేదు. ఎంఈవీ-1 వైరస్ సోకినవారిలో మరణాల రేటు 25 శాతం ఉందని సినిమాలో చెప్పారు. అయితే, ప్రస్తుతం నిజజీవితంలో కోవిడ్ -19 సోకిన వారిలో చనిపోతున్న వారి సంఖ్య 3.4% గా ఉందని ప్రపంచ ఆరోగ్య సంస్థ తెలిపింది.

కంటేజియన్‌లో, ఎంఈవీ-1 వైరస్ బారినపడి నెల రోజుల్లోనే ప్రపంచవ్యాప్తంగా 2.6 కోట్ల మంది చనిపోతారు. కానీ, చైనాలో కరోనావైరస్ వ్యాప్తి ప్రారంభమైన మూడు నెలలు అవుతున్నా దాని బారినపడి మరణించిన వారి సంఖ్య ఇంకా 4,000 దాటలేదు.

నిర్బంధ పరిశీలన

సినిమాలో వైరస్ సోకిన లక్షణాలు కనిపించిన వారిని నిర్బంధ పరిశీలనలో ఉంచి పరీక్షిస్తారు. సినిమాలో అమెరికాలోని షికాగో నగరాన్ని పూర్తిగా మూసివేస్తారు. ఇప్పుడు నిజజీవితంలోనూ అచ్చం అలాగే కరోనావైరస్ ప్రభావంతో చైనాలోని వూహాన్ నగరాన్ని మూసివేశారు.

కోవిడ్ -19 వ్యాప్తిని అరికట్టే ప్రయత్నంలో భాగంగా ఇటలీలోనూ పలు ప్రాంతాలను దిగ్బంధనం చేశారు.

ఆశ్చర్యమేసింది

కరోనావైరస్ వ్యాప్తికి, కంటేజియన్ సినిమా కథాంశానికి మధ్య సారూప్యతలను గమనించాక చాలా ఆశ్చర్యమేసిందని సినిమా కథ రాసిన స్కాట్ జెడ్ బర్న్స్ అంటున్నారు.

ఆధునిక ప్రపంచంలో అలాంటి వ్యాధులు విజృంభించే ప్రమాదం పొంచి ఉందని చెప్పడమే తన ఆలోచన అని ఆయన చెప్పారు.

సినిమా కథ శాస్త్రీయతకు దగ్గరగా ఉండాలన్న ఆలోచనతో, స్క్రిప్ట్ రాసేటప్పుడు ప్రపంచ ఆరోగ్య సంస్థ నిపుణులతో పాటు, పలువురు వైరాలజిస్టులు, ఎపిడెమియాలజిస్టులతోనూ చాలా లోతుగా చర్చించానని ఆయన తెలిపారు.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)