కారులో అస్థిపంజరంతో ప్రయాణం... ఏమిటి కారణం?

26 జనవరి 2020

రహదారిపైన వేగంగా వెళ్లడానికి ఓ వ్యక్తి తన పక్కన అస్థిపంజరాన్ని పెట్టుకొని దానికి టోపీపెట్టి మనిషిలా సీట్లో కూర్చోబెట్టి, హై ఆక్యుపెన్సీ వెహికిల్ లైన్‌లోకి(హెచ్ఓవీ) ప్రవేశించాడు.

కానీ, పోలీసులు అతడిని గుర్తించి అడ్డుకొని జరిమానా విధించారు. ఈ ఘటన అమెరికాలోని ఆరిజోనాలో జరిగింది.

'హెచ్ఓవీ'లోకి ప్రవేశించేందుకే ఆ వ్యక్తి ఓ నకిలీ అస్థిపంజరానికి టోపీ పెట్టి, దానికి సీటు బెల్టు పెట్టి కారులో తీసుకెళ్లాడు. కానీ, ఓ పోలీసు అధికారి అతడిని గుర్తించి అడ్డుకున్నారు.

అతనొక్కడే కాదు, ఆరిజోనాలో ఇలా ఏడాదికి దాదాపు 7వేల మంది డ్రైవర్లు హెచ్‌ఓవీలోకి ప్రవేశించేందుకు ఇలా రకరకాల విన్యాసాలు చేస్తుంటారని అక్కడి పోలీసులు తెలిపారు.

ఏంటీ హెచ్‌ఓవీ లైన్?

అమెరికా, కెనడా, న్యూజీలాండ్ లాంటి దేశాల్లో ఈ హై ఆక్యుపెన్సీ వెహికిల్ లైన్లనే డైమండ్ లైన్, ట్రాన్సిట్ లైన్, కార్ పూల్ లైన్ అని రకరకాల పేర్లతో పిలుస్తారు. కారులో డ్రైవర్‌తో కనీసం మరో వ్యక్తి అయినా ఉన్నప్పుడే ఈ లైన్లలో కారు ప్రవేశించడానికి అనుమతి ఉంటుంది. కొన్ని ప్రాంతాల్లో ట్రాఫిక్ ఎక్కువగా ఉన్నప్పుడు లేదా కొన్ని ప్రాంతాల్లో అన్ని వేళల్లో ఈ లైన్ వాడుకలో ఉంటుంది.

సాధారణంగా కార్ పూలింగ్‌ను ప్రోత్సహించడానికి, రోడ్ల ఆక్యుపెన్సీని పెంచడానికి ఈ లైన్లను ఉపయోగిస్తారు. కేవలం ఒక వ్యక్తే కారు నడుపుతూ ఈ లైన్లలోకి ప్రవేశిస్తే వారికి జరిమానా విధిస్తారు. అందుకే చాలాసార్లు ఆ ఫైన్లను తప్పించుకునేందుకు కొందరు రకరకాల మార్గాలను అన్వేషిస్తారు.

ప్యాసింజర్ సీట్లలో పెద్ద పెద్ద బొమ్మలు, చెక్క కటౌట్‌లు పెట్టడం, దిండుకు దుప్పటికప్పి అది కనిపించకుండా చేయడం, కుక్కలు, పిల్లులు లాంటి పెంపుడు జంతువులకు సీటు బెల్టు పెట్టి తీసుకెళ్లడం.. ఇలా రకరకాల మార్గాల్లో ట్రాఫిక్ పోలీసులను బురిడీ కొట్టించి ఆ మార్గంలో ప్రయాణించడానికి చూస్తారు. సింగిల్ డ్రైవర్లు ప్రయాణించే మార్గంలో రద్దీ ఎక్కువగా ఉంటుంది. అందుకే వేగంగా ప్రయాణం సాగించేందుకే వాళ్లంతా ఇలా చేస్తారు.

ఇక ఆరిజోనాలో అస్థిపంజరాన్ని తీసుకెళ్లిన వ్యక్తి విషయానికి వస్తే, ఆ పని చేసిన వ్యక్తికి 62 ఏళ్లు. అతడిని ట్రోల్ చేస్తూ సోషల్ మీడియాలో అనేక మంది పోస్టులు పెట్టారు. ఆరిజానా పోలీసు శాఖ కూడా ఇలాంటి ట్రిక్కులతో తమను మోసం చేయలేరని పోస్టు పెట్టింది.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

#NiceTry, #YoureNotHeMan లాంటి హ్యాష్ ట్యాగ్‌లు కూడా ట్రెండ్ అయ్యాయి. గతంలో ఇలాంటి ప్రయత్నాలు చేసి దొరికిపోయిన వారి ఫొటోలను కూడా సోషల్ మీడియాలో షేర్ చేశారు.