‘టార్జాన్’ భార్యను పొడిచి చంపిన కొడుకు.. అతడిని కాల్చిచంపిన పోలీసులు

1960ల్లో ప్రజాదరణ పొందిన 'టార్జాన్' టీవీ షోలో టార్జాన్ పాత్రధారి, అమెరికన్ నటుడు రాన్ ఎలీ భార్యను వారి కుమారుడు పొడిచి చంపేశాడు.

అమెరికాలో కాలిఫోర్నియా రాష్ట్రం శాంటా బార్బరా నగరం శివారు హోప్ రాంచ్‌లోని రాన్ ఎలీ నివాసంలో మంగళవారం సాయంత్రం ఈ ఘటన జరిగిందని పోలీసులు తెలిపారు.

రాన్ ఎలీ భార్య వలేరీ లుండీన్ ఎలీ వయసు 62 ఏళ్లు. ఆమె మాజీ మిస్ ఫ్లోరిడా.

వలేరీని చంపిన కుమారుడి పేరు కామెరాన్ ఎలీ. అతడికి 30 ఏళ్లు.

కామెరాన్ ఆచూకీ కోసం ఇంట్లో, పరిసరాల్లో పోలీసులు గాలింపు జరిపారని శాంటా బార్బరా కౌంటీ షెరిఫ్ ఒక ప్రకటనలో తెలిపారు. ఇంటి వెలుపల అతడు కనిపించాడని, అప్పుడు పోలీసులు చుట్టుముట్టారని చెప్పారు.

కామెరాన్ నుంచి ముప్పు ఎదురైందని, దీంతో నలుగురు పోలీసులు వారి తుపాకులతో అతడిపై కాల్పులు జరిపారని, ఈ గాయాలతో చనిపోయాడని షెరిఫ్ వివరించారు.

కామెరాన్ దాడిలో రాన్ ఎలీ గాయపడ్డారనే సమాచారమేదీ లేదు.

ఇంట్లో కదల్లేని స్థితిలో ఉన్న ఒక వృద్ధుడిని పరీక్షల నిమిత్తం ఆస్పత్రికి తరలించినట్లు పోలీసులు తెలిపారు. ఆయన రాన్ ఎలీయేనా అనేది అధికారికంగా స్పష్టం కాలేదు.

రాన్ ఎలీ పూర్తి పేరు రొనాల్డ్ పియర్స్ ఎలీ. ఆయనకు 81 ఏళ్లు.

1966 నుంచి 1968 మధ్య ఎన్‌బీసీలో ప్రసారమైన టార్జాన్ టీవీ సిరీస్‌లో రాన్ ఎలీ పోషించిన పాత్ర ఆయనకు బాగా పేరు తెచ్చిపెట్టింది.

టార్జాన్- ఎడ్గర్ రైస్ బరోస్ రాసిన 1914 నాటి పుస్తకంలోని ఓ కల్పిత పాత్ర. ఇందులోని కథనం ప్రకారం టార్జాన్‌ను ఆఫ్రికా అడవుల్లో ఏప్‌లు పెంచి పెద్ద చేస్తారు.

1975 నాటి చిత్రం 'డాస్ సావేజ్: ద మ్యాన్ ఆఫ్ బ్రోంజ్‌'‌లో రాన్ ఎలీ కథానాయకుడి పాత్ర పోషించారు.

రాన్ ఎలీ దంపతులకు ఇద్దరు కుమార్తెలు కిర్‌స్టెన్, కైట్‌ల్యాండ్ ఉన్నారు.

న్యూ హాంప్‌షైర్‌లోని ప్రముఖ 'ఫిలిప్స్ ఎక్స్‌టర్ అకాడమీ' బోర్డింగ్ స్కూల్‌లో, హార్వర్డ్ విశ్వవిద్యాలయంలో కామెరాన్ చదువుకున్నాడని అమెరికా మీడియా తెలిపింది.

2001-14 మధ్య రాన్ ఎలీ నటన నుంచి సుదీర్ఘ విరామం తీసుకున్నారు. తర్వాత తిరిగి బుల్లితెరపైకి వచ్చారు. 'ఎక్స్‌పెక్టింగ్ ఆమిష్' చిత్రంలో నటించారు.

పిల్లల పెంపకం, పిల్లలతో ఎక్కువ సమయం గడపడం కోసం తాను ఇంతకాలం నటనకు దూరంగా ఉన్నానని ఈ చిత్రం విడుదల సమయంలో రాన్ ఎలీ 'షార్లెట్ అబ్జర్వర్'‌ పత్రికతో చెప్పారు.

ఇప్పుడు పిల్లలందరూ పెద్దవాళ్లయ్యారని, కళాశాల విద్య కూడా పూర్తిచేసుకున్నారని ఆయన తెలిపారు.

రాన్ ఎలీ నవలాకారుడు కూడా. ఆయన రాసిన రెండు యాక్షన్ థ్రిల్లర్ నవలల్లో 'నైట్ షాడోష్' 1994లో, 'ఈస్ట్ బీచ్' 1995లో వెలువడ్డాయి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)