రెండో ప్రపంచ యుద్ధం నాటి 500 కిలోల బాంబు... జర్మనీ పట్టణాన్ని ఖాళీ చేయించిన అధికారులు

రెండో ప్రపంచ యుద్ధ కాలం నాటి బాంబును నిర్వీర్యం చేసేందుకు జర్మనీలోని ఒక పట్టణాన్ని అధికారులు ఆరు గంటల పాటు ఖాళీ చేయించారు.

మధ్య జర్మనీలోని లుడ్విషఫెన్ పట్టణంలో గతవారం ఈ బాంబు లభ్యమైంది. దీనిని నిర్వీర్యం చేసేందుకుగాను పట్టణంలోని దాదాపు 18,500 మందిని స్థానిక కాలమానం ప్రకారం ఉదయం 8 గంటల నుంచి మధ్యాహ్నం 2 గంటల వరకు అధికారులు వేరే ప్రాంతానికి పంపించారు.

500 కేజీల బరువున్న ఈ వైమానిక బాంబును భవన నిర్మాణ కార్మికులు కనుగొన్నారు.

నాజీలకు వ్యతిరేకంగా ఆనాటి మిత్ర రాజ్యాలు చేసిన బాంబు దాడుల్లో పేలకుండా మిగిలిపోయిన బాంబులతో జర్మనీ నిండిపోయింది. ఇప్పటికీ దేశవ్యాప్తంగా పలు ప్రాంతాల్లో ఈ పేలని బాంబులు ఉన్నాయి.

గత వారం లభించిన ఈ భారీ బాంబు ఫొటోను నగర అధికారులు ట్విటర్‌లో పోస్ట్ చేశారు.

రెండో ప్రపంచ యుద్ధం జరుగుతున్నప్పుడు అమెరికా దళాలు ఈ బాంబును జర్మనీపై వేసి ఉండొచ్చని భావిస్తున్నారు.

2017 సెప్టెంబర్‌లో ఫ్రాంక్‌ఫర్ట్ నగరంలో కూడా రెండో ప్రపంచ యుద్ధం బాంబు ఒకటి లభించింది. దీంతో దాదాపు 70 వేల మంది ప్రజలను అధికారులు ఖాళీ చేయించారు.

ఈ ఏడాది ఏప్రిల్‌లో జర్మనీ రాజధాని నగరం బెర్లిన్‌ ప్రధాన రైల్వే స్టేషన్‌ను కూడా ఇదేవిధంగా ఖాళీ చేయించారు. అప్పట్లో సరిగ్గా ఇలాగే 500 కేజీల బరువున్న బాంబును నిర్మాణ కార్మికులు కనుగొన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)