ఏపీ కేబినెట్ నిర్ణయం: కాపులకు 5 శాతం రిజర్వేషన్లు

కాపులకు 5శాతం రిజర్వేషన్లు కల్పిస్తూ ఆంధ్రప్రదేశ్ మంత్రిమండలి నిర్ణయించింది.

ఈ మేరకు మంత్రి గంటా శ్రీనివాసరావు మంత్రి మండలి సమావేశానంతరం విలేకర్లతో చెప్పారు.

''కాపుల రిజర్వేషన్లకు సంబంధించి కేబినెట్లో కీలకమైన నిర్ణయం తీసుకున్నాం. శనివారం ఉదయం 8.30కి కేబినెట్ సమావేశం జరుగుతుంది. అక్కడ దీన్ని ప్రత్యేకంగా ఆమోదించాక 9 గంటలకు అసెంబ్లీలో ఈ బిల్లు పెడతాం'' అని గంటా వెల్లడించారు.

కాపు, తెలగ, బలిజ, ఒంటరి కులాలకు బీసీ (ఎఫ్) కేటగిరీ కింద 5 శాతం రిజర్వేషన్లు ఇవ్వాలని నిర్ణయం తీసుకున్నట్లు వివరించారు.

రిజర్వేషన్లు 50 శాతం దాటుతాయి కదా.. అని విలేకర్లు ప్రశ్నించినపుడు.. ప్రొసీజర్ ప్రకారం 9వ షెడ్యూల్లో పెట్టి దీన్ని కేంద్ర ప్రభుత్వానికి పంపిస్తామని గంటా తెలిపారు.

ఈ అంశంపై ఉప ముఖ్యమంత్రి చినరాజప్ప 'బీబీసీ'తో మాట్లాడుతూ.. రిజర్వేషన్లపై పూర్తి వివరాలతో శనివారం సాయంత్రం జీవో విడుదల చేస్తామని తెలిపారు.

విశ్వసనీయ వర్గాల సమాచారం ప్రకారం.. విద్య, ప్రభుత్వ ఉద్యోగాలు, ఆర్థిక ప్రయోజనాల అంశాల్లో మాత్రమే ఈ రిజర్వేషన్లు వర్తిస్తాయి. ఎలాంటి రాజకీయ పదవులకు రిజర్వేషన్లు వర్తించవు.

ప్రస్తుతం రిజర్వేషన్లు పొందుతున్న బీసీల ప్రయోజనాలకు తాజా రిజర్వేషన్ల వల్ల ఎలాంటి భంగం వాటిల్లదు.

కాపులను బీసీలుగా చేర్చాలన్న అంశంపై నియమించిన జస్టిస్ మంజునాథ కమిషన్ నివేదికను సమర్పించింది. ఈ నివేదిక ప్రకారం కాపు, బలిజ, ఒంటరి, తెలగ కులాలను బీసీలుగా గుర్తిస్తారు.

కొత్తగా బీసీ-ఎఫ్ కేటగిరి సృష్టించి వీరిని అందులో చేరుస్తారు.

శనివారం శాసనసభలో ఈ అంశంపై చర్చించి ఆ బిల్లును గవర్నర్‌కు పంపిస్తారు.

రాష్ట్రంలో రిజర్వేషన్ల కోటా 50 శాతం మించడంతో ఆమోదం కోసం కేంద్రానికి కూడా ఈ బిల్లును పంపుతారు.

ఇవికూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)