అధికారిక లాంఛనాలతో రతన్ టాటా అంత్యక్రియలు

10 అక్టోబర్ 2024

భారత పారిశ్రామిక దిగ్గజాల్లో ఒకరైన రతన్‌ టాటా (86) కన్నుమూశారు. ఆయన ముంబయిలోని ఓ ఆస్పత్రిలో చికిత్స పొందుతూ బుధవారం రాత్రి తుదిశ్వాస విడిచారు.

రతన్ టాటా మరణాన్ని ధృవీకరిస్తూ టాటా గ్రూప్ చైర్మన్ ఎన్. చంద్రశేఖరన్ ఒక ప్రకటన విడుదల చేశారు.

తన వయసు దృష్ట్యా సాధారణ వైద్యపరీక్షలు చేయించుకునేందుకు ఆస్పత్రికి వెళ్తున్నానని, ఆందోళన చెందాల్సిన అవసరం లేదని రతన్ టాటా అక్టోబర్ 7న సోషల్ మీడియా ద్వారా తెలియచేశారు. కానీ ఐసీయూలో చికిత్స పొందుతూ అక్టోబర్ 9న తుది శ్వాస విడిచారు.

రతన్ టాటా మృతి పట్ల రాష్ట్రపతి, ప్రధాని సహా పలువురు ప్రముఖులు దిగ్భ్రాంతి వ్యక్తం చేశారు.

ముంబయిలో రతన్ టాటా చనిపోయిన ఆస్పత్రి దగ్గర పోలీసులు — ఫొటో క్యాప్షన్, ముంబయిలో రతన్ టాటా తుదిశ్వాస విడిచిన ఆస్పత్రి దగ్గర పోలీసులు

అధికారిక లాంఛనాలతో రతన్ టాటా అంత్యక్రియలు

రతన్ టాటా అంత్యక్రియలను అధికారిక లాంఛనాలతో నిర్వహిస్తామని మహారాష్ట్ర ముఖ్యమంత్రి ఏక్‌నాథ్ షిండే తెలిపారు.

ఆయన భౌతికకాయాన్ని ఉదయం 10 గంటల నుంచి మధ్యాహ్నం 3.30 గంటల వరకు ప్రజల సందర్శనార్థం ముంబయిలోని నేషనల్ సెంటర్ ఫర్ పెర్ఫార్మింగ్ ఆర్ట్స్(ఎన్‌సీపీఏ)లో ఉంచుతామని ముఖ్యమంత్రి చెప్పారు.

రతన్ టాటా 1937 డిసెంబర్ 28న నావల్ టాటా, సూనూ టాటా దంపతులకు జన్మించారు. ఆయన పాఠశాల విద్య ముంబయిలో పూర్తయింది.

అమెరికాలోని కార్నెల్ యూనివర్శిటీలో ఇంజినీరింగ్ చదివారు. 1962లో టాటా ఇండస్ట్రీస్‌లో చేరారు.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

1991లో టాటా గ్రూప్‌కు చైర్మన్‌గా నియమితులై, 2012 వరకు ఆ బాధ్యతలు నిర్వహించారు. ఆ తర్వాత ఆయన టాటా గ్రూప్ గౌరవ చైర్మన్‌గా కొనసాగారు.

రతన్ టాటాకు భారత ప్రభుత్వం పద్మ భూషణ్, పద్మ విభూషణ్ అవార్డులతో సత్కరించింది. 2023లో ఆర్డర్ ఆఫ్ ఆస్ట్రేలియాతో ఆ దేశం రతన్ టాటాను గౌరవించింది.

టాటా ఇండికా విడుదల సమయంలో రతన్ టాటా — ఫొటో క్యాప్షన్, టాటా ఇండికా కారు ఆవిష్కరణ సమయంలో రతన్ టాటా

సాల్ట్ నుంచి సాఫ్ట్‌వేర్ వరకు..

సాల్ట్ నుంచి సాఫ్ట్‌వేర్ వరకు.. 100కు పైగా కంపెనీలు టాటా గ్రూప్‌ నేతృత్వంలో నడుస్తున్నాయి. ఈ కంపెనీల్లో సుమారు 6,60,000 మంది ఉద్యోగులు ఉన్నారు.

టాటా గ్రూప్‌కు రతన్ టాటా చైర్మన్‌గా ఉన్న సమయంలో.. పలు ప్రముఖ కంపెనీల కొనుగోళ్లను చేపట్టారు. ఆంగ్లో-డచ్ స్టీల్‌ తయారీ సంస్థ కోరస్, బ్రిటన్‌కు చెందిన జాగ్వార్ అండ్ ల్యాండ్ రోవర్, ప్రపంచంలోనే రెండో అతిపెద్ద టీ కంపెనీ టెట్లీ వంటి సంస్థలను టాటా గ్రూప్ టేకోవర్‌ చేసింది.

2011లో ఎకనమిస్ట్ మేగజీన్ ప్రచురించిన ఆయన ప్రొఫైల్‌లో, టాటా ఒక ‘టైటాన్‌’ అని అభివర్ణించింది. ఒక ఫ్యామిలీ గ్రూప్‌ను గ్లోబల్ పవర్‌హౌస్‌గా నిలపడంలో ఆయన పాత్రను కొనియాడింది.